काठमाडौं । अनुमति नपाए पनि शिक्षामन्त्री धर्मेन्द्र प्रधानको राजीनामा माग गर्दै ‘कक्रोच’ आन्दोलनका हजारौँ समर्थक सोमबार नयाँदिल्लीमा संसद् भवनतर्फ मार्च गर्न भेला भएका छन्।
प्रदर्शनलाई नियन्त्रण गर्न जन्तरमन्तर क्षेत्रमा ठूलो सङ्ख्यामा प्रहरी परिचालन गरिएको छ भने संसद् आसपास सुरक्षा कडा पारिएको छ। प्रहरीले प्रदर्शनकारीलाई अघि नबढ्न र तितरबितर हुन आग्रह गरेको छ।
विद्यार्थी, पेशाकर्मी र सर्वसाधारण सहभागी भएको प्रदर्शनमा शिक्षामन्त्री प्रधान र प्रधानमन्त्री नरेन्द्र मोदीविरुद्ध नाराबाजी गरिएको छ। प्रदर्शनकारीहरूले परीक्षा प्रणाली सुधार, प्रश्नपत्र चुहावट नियन्त्रण र प्रभावित विद्यार्थीका परिवारलाई क्षतिपूर्तिको माग गरेका छन्।
‘कक्रोच जनता पार्टी’ नामले चिनिएको यो आन्दोलन मे महिनामा सर्वोच्च अदालतका प्रधानन्यायाधीशको एक टिप्पणीपछि सुरु भएको थियो। बेरोजगार युवालाई ‘कक्रोच’सँग तुलना गरिएको उक्त टिप्पणीलाई व्यङ्ग्यात्मक रूपमा प्रयोग गर्दै सामाजिक सञ्जालमार्फत आन्दोलन विस्तार भएको हो।
मेडिकल कलेज र सरकारी सेवाका प्रवेश परीक्षामा प्रश्नपत्र चुहावटका घटनाले आन्दोलनलाई थप बल दिएको छ। अभियन्ता सोनम वाङचुकको अनशन र उनलाई अस्पताल लगिएको घटनापछि पनि आन्दोलनले समर्थन बढाएको छ।
प्रदर्शनकारीहरू विगत एक महिनादेखि जन्तरमन्तरमा धर्नामा छन्। उनीहरूले सरकारसँग शिक्षा सुधारका लागि ठोस प्रतिबद्धता माग गर्दै आएका छन्।
दिल्ली प्रहरीले संसद्को मनसुन अधिवेशनका कारण सुरक्षा जोखिम देखाउँदै मार्चको अनुमति नदिएको जनाएको छ। सरकारका मन्त्रीहरूले आन्दोलनप्रति आलोचनात्मक धारणा राखेका छन् भने विपक्षी दल, नागरिक अधिकारकर्मी र केही कलाकारहरूले प्रदर्शनप्रति समर्थन जनाएका छन्।
