काठमाडौं। चिलीमा आएको शक्तिशाली आँधीसहितको भारी वर्षाका कारण कम्तीमा १३ जनाको मृत्यु भएको छ भने ठूलो क्षेत्र प्रभावित भएको छ। प्राकृतिक विपत्तिपछि उद्धार तथा राहत कार्यलाई तीव्र बनाउँदै प्रभावित क्षेत्रमा आधारभूत सेवा पुनः सञ्चालन गर्ने काम भइरहेको सरकारी अधिकारीहरूले बताएका छन्।
अधिकारीहरूका अनुसार आँधीका कारण ६० हजार किलोमिटरभन्दा बढी सडक क्षेत्रमा क्षति पुगेको छ। गत जुलाई १५ बाट देशको दक्षिणी भागबाट सुरु भएको खराब मौसमले विशेषगरी कोकिम्बो र अटाकामा क्षेत्रलाई प्रभावित बनाएको छ, जुन सामान्यतया सुख्खा क्षेत्रका रूपमा चिनिन्छन्।
चिलीको राष्ट्रिय आपतकालीन सेवा (सेनाप्रेड) की निर्देशक एलिसिया सेब्रियनले पत्रकार सम्मेलनमार्फत घटनामा १३ जनाको मृत्यु भएको पुष्टि गरेकी छन्। उनका अनुसार सात जना अझै बेपत्ता रहेका छन्।
भारी वर्षाका कारण करिब २ हजार ८०० घरमा क्षति पुगेको छ। बाढी, हिलो र अवरुद्ध नदी तथा सडकका कारण विभिन्न शहरहरूमा जनजीवन प्रभावित भएको सरकारले जनाएको छ।
स्थानीय बासिन्दाहरूले आँधीले असामान्य आपतकालीन अवस्था सिर्जना गरेको बताएका छन्। कोकिम्बोकी अधिकारी प्याट्रिसिया अलबोर्नोजलाई उद्धृत गर्दै एएफपीले नदीहरूमा तीव्र गतिमा बाढी आएको जनाएको छ।
आन्तरिक मन्त्री क्लाउडियो अल्भाराडोले वर्षा क्रमशः कम हुने अनुमान गरिए पनि नदी र खोलाहरूमा पानीको बहाव उच्च रहेकाले जोखिम अझै कायम रहेको बताएका छन्।
प्राकृतिक विपत्तिबाट प्रभावित क्षेत्रको अवस्थालाई ध्यानमा राख्दै राष्ट्रपति जोस एन्टोनियो कास्टले आपतकाल घोषणा गरेका छन्। सरकारले उद्धार, राहत वितरण र प्रभावित नागरिकको सुरक्षा व्यवस्थालाई प्राथमिकतामा राखेको जनाएको छ।
