काठमाडौं । अमेरिकी विदेशमन्त्री मार्को रुबियोले इरानले हर्मुज जलघाँटीमाथि नियन्त्रण कायम गर्न खोजे त्यसले विश्वव्यापी समुद्री व्यापार र अन्तर्राष्ट्रिय जलयात्रामा गम्भीर असर पर्ने चेतावनी दिएका छन्।
आसियान विदेशमन्त्रीहरूको मनिलामा जारी बैठकलाई सम्बोधन गर्दै रुबियोले कुनै पनि मुलुकलाई अन्तर्राष्ट्रिय जलमार्ग नियन्त्रण गर्ने वा त्यहाँबाट आवतजावत गर्ने जहाजमाथि दबाब सिर्जना गर्ने अधिकार नभएको बताए। उनले यस्तो अभ्यासले अन्तर्राष्ट्रिय समुद्री कानुन र स्वतन्त्र जलयात्राको सिद्धान्त कमजोर बनाउने उल्लेख गरे।
उनले हर्मुज जलघाँटीमा इरानले दाबी गरिरहेको अधिकारलाई अन्तर्राष्ट्रिय कानुनले मान्यता नदिने स्पष्ट पार्दै समुद्री मार्ग सबैका लागि खुला रहनुपर्नेमा जोड दिए।
रुबियोको अभिव्यक्ति अमेरिकी सेनाले इरानको सैन्य पूर्वाधारमाथि लगातार आक्रमण जारी रहेको जानकारी सार्वजनिक गरेपछि आएको हो। अमेरिकाले ती कारबाहीको उद्देश्य हर्मुज जलघाँटीमा व्यापारिक जहाजको सुरक्षामा देखिएको जोखिम कम गर्नु रहेको जनाएको छ।
उनले दक्षिण चीन सागरमा देखिएको समुद्री तनावप्रति पनि चासो व्यक्त गर्दै आसियान सदस्य राष्ट्रहरूसँग क्षेत्रीय सुरक्षाबारे छलफल गर्ने बताए। मनिला भ्रमणका क्रममा रुबियोले चिनियाँ विदेशमन्त्री वाङ यीसँग भेटवार्ता गर्नुका साथै क्वाड समूहका साझेदार मुलुकका प्रतिनिधिसँग पनि छलफल गर्ने कार्यक्रम रहेको छ।
यसैबीच, रुबियोले अमेरिका इरानसँग कूटनीतिक वार्ताका लागि अझै तयार रहेको बताए। तर, तेहरानले वार्तालाई गम्भीरतापूर्वक नलिए अमेरिका र उसका साझेदार राष्ट्रको हित रक्षा गर्न आवश्यक कदम चालिने चेतावनी पनि उनले दिएका छन्।
