काठमाडौं । धनुषाको सबैला नगरपालिका–१२ स्थित मन्दिर परिसरमा मृत अवस्थामा फेला परेका बन्ठु राउत कडेरी पुजारी नभएको प्रहरीले जनाएको छ।
मधेस प्रदेश प्रहरी कार्यालयका प्रहरी नायब महानिरीक्षक (डीआईजी) ओमप्रसाद अधिकारीले सामाजिक सञ्जाल तथा केही सञ्चार माध्यममा कडेरीलाई पुजारी भनेर उल्लेख गरिएको विवरण गलत भएको स्पष्ट पारेका छन्।
संवेदनशील घटनाका विषयमा अपुष्ट सूचना फैलिँदा भ्रम सिर्जना हुन सक्ने भन्दै उनले तथ्य पुष्टि नगरी सूचना सम्प्रेषण नगर्न आग्रह गरेका छन्।
जिल्ला प्रहरी कार्यालय धनुषाले पनि विज्ञप्ति जारी गर्दै मृतक कडेरी मन्दिरका पुजारी नभई बाहिर काम गर्ने र कहिलेकाहीँ मन्दिर परिसरमा बस्ने व्यक्ति रहेको जनाएको छ।
धनुषाका प्रहरी नायब उपरीक्षक मधुसुधन न्यौपानेका अनुसार मन्दिर परिसरमा भेटिएको शव कडेरीकै भएको पुष्टि भएको छ। घटनाको वास्तविक कारण पत्ता लगाउन थप अनुसन्धान भइरहेको र त्यसका लागि कुकुरसहितको अनुसन्धान टोलीसमेत परिचालन गरिएको उनले जानकारी दिए।
प्रहरीले घटनालाई धार्मिक विषयसँग जोडेर नहेर्न आग्रह गरेको छ। प्रारम्भिक विवरणअनुसार कडेरी नियमित रूपमा मन्दिरमा पूजा गर्ने व्यक्ति नभई बाहिर काम गर्ने क्रममा कहिलेकाहीँ त्यहाँ बस्ने गरेको प्रहरीले जनाएको छ।
घटनामा संलग्न जोसुकै भए पनि अनुसन्धानपछि कानुनी दायरामा ल्याइने प्रहरीको भनाइ छ।
