काठमाडौँ । वैदेशिक रोजगार विभागले आफ्नो पूर्वस्वीकृतिविना विदेशी विमानस्थल प्रयोग गरी नेपाली श्रमिकलाई वैदेशिक रोजगारीमा पठाएको अभियोगमा थप ३९ वटा वैदेशिक रोजगार व्यवसायी संस्थामाथि कारबाही गरेको छ।
विभागले सार्वजनिक गरेको सूचनाअनुसार ती संस्थालाई वैदेशिक रोजगार ऐन, २०६४ बमोजिम जनही ५० हजार रुपैयाँका दरले जरिबाना गरिएको हो।
वैदेशिक रोजगार ऐन, २०६४ को दफा २२ अनुसार श्रमिकलाई स्वदेशी विमानस्थलमार्फत मात्र वैदेशिक रोजगारीमा पठाउनुपर्ने व्यवस्था छ। सो प्रावधानको कार्यान्वयन अवस्था मूल्याङ्कन गर्न विभागले २०८२ चैत १ देखि २०८३ जेठ ३१ गतेसम्म श्रम स्वीकृति प्राप्त गरी विदेश गएका श्रमिकहरूको उडानसम्बन्धी विवरण माग गरेको थियो।
विभागका अनुसार अनुगमनका क्रममा मागिएको विवरण उपलब्ध नगराउने वा विभागको स्वीकृतिबिना विदेशी विमानस्थल प्रयोग गरेको पाइएका गरी हालसम्म ५९८ वटा म्यानपावर कम्पनी कारबाहीको दायरामा परिसकेका छन्।
यसअघि विवरण बुझाउन निर्देशन दिइएका केही संस्थाले पछि विवरण पेस गरे पनि त्यसबाट विदेशी विमानस्थल प्रयोग गरी श्रमिक पठाएको पुष्टि भएपछि थप ३९ संस्थालाई जरिबाना गरिएको विभागले जनाएको छ। विभागका अनुसार यो कारबाही वैदेशिक रोजगार ऐन, २०६४ को दफा ५४ बमोजिम कसुर दोहोरिएको आधारमा गरिएको हो।
यस्तै, पटक–पटक निर्देशन दिँदासमेत आवश्यक विवरण उपलब्ध नगराएका १२४ वटा वैदेशिक रोजगार व्यवसायी संस्थालाई पनि किन ५० हजार रुपैयाँ जरिबाना नगर्ने भन्ने विषयमा सात दिनभित्र स्पष्टीकरण पेस गर्न निर्देशन दिइएको विभागले जनाएको छ।
