काठमाडौँ। युक्रेनको राजधानी किएभ र आसपासका क्षेत्रमा रुसले गरेको पछिल्लो मिसाइल तथा ड्रोन आक्रमणमा कम्तीमा १७ जनाको मृत्यु भएको छ भने ४४ जना घाइते भएका छन्। उद्धार कार्य जारी रहेकाले हताहतको संख्या अझ बढ्न सक्ने अधिकारीहरूले बताएका छन्।
रुसले पछिल्ला साताहरूमा ब्यालेस्टिक मिसाइलको प्रयोग बढाएपछि युक्रेनले सहयोगी राष्ट्रहरूसँग थप अमेरिकी प्याट्रियट हवाई प्रतिरक्षा प्रणाली र इन्टरसेप्टर मिसाइल उपलब्ध गराउन आग्रह दोहोर्याएको छ।
युक्रेनी वायुसेनाले ब्यालेस्टिक मिसाइल आक्रमणको चेतावनी जारी गरेलगत्तै किएभमा शक्तिशाली विस्फोट भएका थिए। आक्रमणपछि विभिन्न स्थानमा आगलागी भएको, आवासीय भवन, गोदाम, रेलवे पूर्वाधार तथा अन्य नागरिक संरचनामा क्षति पुगेको जनाइएको छ।
किएभ सहरमा एक महिलाको मृत्यु भएको छ भने कम्तीमा २४ जना घाइते भएका छन्। आसपासको किएभ क्षेत्रमा १६ जनाको मृत्यु भएको युक्रेनी अधिकारीहरूले जनाएका छन्। क्षेत्रीय सैन्य प्रशासनका प्रमुख तिमुर ट्काचेन्कोले यसलाई हालसम्मकै सबैभन्दा दुःखद आक्रमणमध्ये एक भएको बताएका छन्।
युक्रेनका राष्ट्रपति भोलोदिमिर जेलेन्स्कीले पर्याप्त ब्यालेस्टिक मिसाइल प्रतिरक्षा प्रणालीको अभावले यस्ता आक्रमणबाट नागरिकको ज्यान गुमिरहेको बताएका छन्। उनले थप प्याट्रियट इन्टरसेप्टर उपलब्ध गराउन र युक्रेनमै उत्पादनको अनुमति दिन सहयोगी राष्ट्रहरूसँग आग्रह गरेका छन्।
यता, युक्रेनले पनि रुसभित्रका ऊर्जा तथा रसद पूर्वाधारलाई लक्षित गर्दै ड्रोन आक्रमण तीव्र पारेको जनाएको छ। मस्को क्षेत्रमा भएको युक्रेनी ड्रोन आक्रमणमा पाँच जनाको मृत्यु भएको र अन्य १० जना घाइते भएको रूसी अधिकारीहरूले बताएका छन्। रूसी रक्षा मन्त्रालयका अनुसार रातभर देशका विभिन्न क्षेत्रमा एक सयभन्दा बढी युक्रेनी ड्रोन खसालिएको छ।
संयुक्त राष्ट्रसंघका मानव अधिकार पर्यवेक्षकहरूले सन् २०२२ मा युद्ध सुरु भएयता नागरिक हताहतको संख्या निरन्तर बढ्दै गएको भन्दै गम्भीर चिन्ता व्यक्त गरेका छन्। रुसले भने आफ्ना आक्रमणहरू सैन्य तथा सैन्य–सम्बन्धित पूर्वाधारलाई लक्षित गरिएको दाबी गर्दै आएको छ।
