काठमाडौं। प्रधानमन्त्री वालेन्द्र साहले भोटेकोशी बाढीबाट प्रभावित नागरिकको उद्धार तथा राहतलाई प्रभावकारी र समन्वयात्मक रूपमा अघि बढाउन सम्बन्धित निकायलाई निर्देशन दिएका छन्।

प्रधानमन्त्री तथा मन्त्रिपरिषद्को कार्यालयमा सम्पन्न विपद् जोखिम न्यूनीकरण तथा व्यवस्थापन राष्ट्रिय परिषद्को बैठकमा प्रधानमन्त्री साहले प्रभावित क्षेत्रको अवस्था, भएको क्षति तथा उद्धार र राहतका लागि भइरहेका प्रयासबारे जानकारी लिएका थिए।

बैठकपछि उनले प्रभावित नागरिकको खोजी, उद्धार र राहत कार्यलाई थप प्रभावकारी बनाउन सम्बन्धित सरकारी निकाय तथा सुरक्षा संयन्त्रलाई आवश्यक समन्वयका साथ परिचालन गर्न निर्देशन दिएको प्रधानमन्त्रीका प्रेस तथा अनुसन्धान विज्ञ दीपा दाहालले जानकारी दिइन्।

प्रधानमन्त्री साहले विपद्को यस कठिन अवस्थामा सबैलाई आ–आफ्नो क्षेत्रबाट प्रभावित स्थानमा परिचालित भएर नागरिकको उद्धार, खोजी तथा राहतमा सहयोग गर्न आग्रहसमेत गरेका छन्।

Read More

काठमाडौं । पाकिस्तानको राजधानी इस्लामाबादस्थित सरकारी अस्पताल पाकिस्तान इन्स्टिच्युट अफ मेडिकल साइन्सेज (पिम्स) को बाल वार्डमा आगलागी हुँदा १४ नवजात शिशुको मृत्यु भएको छ। अस्पतालका कार्यकारी निर्देशक इमरान सिकन्दरले शिशुहरूको मृत्यु भएको पुष्टि गरेका छन्।

इस्लामाबाद जिल्ला प्रशासनका अनुसार आगलागी अस्पतालको एमसिएच वार्डको तेस्रो तलामा भएको हो। आगलागीको सूचना पाएलगत्तै उद्धार टोली घटनास्थल पुगेको थियो।

आगलागी नियन्त्रणमा लिएपछि वार्डमा रहेका शिशुहरूलाई तत्काल सघन उपचार कक्ष (आईसीयू)मा सारिएको प्रशासनले जनाएको छ। दुर्घटनाका बेला उक्त वार्डमा १५ जना नवजात शिशु भर्ना रहेको बताइएको छ।

अस्पतालकी प्रवक्ता डा. अनिला जलिलका अनुसार एसी युनिटबाट आगो सल्किएको र अक्सिजन सिलिन्डर तथा लाइनका कारण आगो तीव्र रूपमा फैलिएको थियो। यद्यपि प्रारम्भिक चरणमा उनले कुनै पनि शिशुको मृत्यु पुष्टि नभएको बताएकी थिइन्।

घटनाको वास्तविक कारण पत्ता लगाउन अतिरिक्त डेपुटी कमिसनर जनरलको संयोजकत्वमा छानबिन समिति गठन गरिएको छ। समितिले आगलागीको कारण तथा घटनाका अन्य पक्षबारे अनुसन्धान गर्नेछ।

घटनापछि इस्लामाबादका मुख्य आयुक्त र प्रहरी प्रमुखसमेत घटनास्थल पुगेका थिए। घटनाबारे थप विवरण आउन बाँकी रहेको छ।

Read More

काठमाडौं, भदौ १० । रसुवाको स्याफ्रुबेँसी, टिमुरेलगायतका क्षेत्रमा बुधबार बिहान आएको भीषण बाढीपछि सरकार तत्काल उद्धार, खोजी तथा राहतमा जुटेको छ। जोखिममा रहेका तल्लो तटीय क्षेत्रका बासिन्दालाई सुरक्षित स्थानमा सार्न सम्बन्धित जिल्लाका प्रमुख जिल्ला अधिकारीलाई निर्देशन दिइएको छ।

बाढीको जोखिमलाई ध्यानमा राख्दै सरकारले पृथ्वी राजमार्ग, गल्छी–नुवाकोट–रसुवा–स्याफ्रुबेँसी सडकखण्ड तथा मुग्लिन–नारायणगढ सडकमा यात्रा नगर्न सर्वसाधारणलाई आग्रह गरेको छ।

प्रधानमन्त्री वालेन्द्र शाहको निर्देशनपछि नेपाल प्रहरी, सशस्त्र प्रहरी बल, नेपाली सेना तथा जिल्ला प्रशासन कार्यालयका संयन्त्र प्रभावित क्षेत्रमा परिचालन भएका छन्। उद्धार तथा खोजी कार्यलाई तीव्र बनाइएको सरकारले जनाएको छ।

उद्धारका लागि सेनाका दुई हेलिकप्टर परिचालन

मेडिकल टोलीसहित नेपाली सेनाका दुई हेलिकप्टर प्रभावित क्षेत्रतर्फ पठाइएको छ। थप उद्धारका लागि निजी क्षेत्रका हेलिकप्टरलाई समेत तयारी अवस्थामा राखिएको छ।

बाढीबाट प्रभावित क्षेत्रमा उद्धार तथा राहतलाई प्रभावकारी बनाउन गृह मन्त्रालयमा राष्ट्रिय विपद् जोखिम न्यूनीकरण तथा व्यवस्थापन प्राधिकरणको बैठकसमेत जारी छ।

प्रधानमन्त्री शाहले बाढीबाट उत्पन्न अवस्थाबारे तत्काल छलफल गरी आवश्यक निर्णय लिन बुधबार बिहान ११ बजे सिंहदरबारस्थित प्रधानमन्त्री तथा मन्त्रिपरिषद्को कार्यालयमा विपद् जोखिम न्यूनीकरण तथा व्यवस्थापन राष्ट्रिय परिषद्को बैठक बोलाएका छन्।

Read More

काठमाडौं। रसुवाको भोटेकोशी नदीमा बुधबार बिहान अचानक आएको ठूलो बाढीपछि टिमुरे क्षेत्रमा ड्युटीमा खटिएको सशस्त्र प्रहरी टोलीसँग सम्पर्क टुटेको छ। बाढीका कारण टिमुरे क्षेत्रमा ठूलो क्षति भएको आशंका गरिएको छ।

सशस्त्र प्रहरी बलका सहप्रवक्ता शैलेन्द्र थापाका अनुसार बाढीले टिमुरे क्षेत्रमा ठूलो क्षति पुर्‍याएको प्रारम्भिक अनुमान छ। टिमुरेमा रहेको सशस्त्र प्रहरीको बोर्डर आउट पोस्ट (बीओपी) भवन भने सुरक्षित रहेको उनले बताए।

तर, कार्यक्षेत्रमा खटिएका सुरक्षाकर्मीसँग भने हालसम्म सम्पर्क हुन सकेको छैन। बाढीका कारण प्रभावित क्षेत्रमा सम्पर्क तथा आवागमन प्रभावित भएको जनाइएको छ।

सम्पर्कविहीन सुरक्षाकर्मीसँग सम्पर्क स्थापित गर्न तथा टिमुरे क्षेत्रको वास्तविक अवस्था बुझ्न प्रयास भइरहेको सहप्रवक्ता थापाले जानकारी दिए। घटनाबारे थप विवरण आउन बाँकी रहेको छ।

Read More

काठमाडौं । चीनको तिब्बततर्फबाट भोटेकोशी नदीमा अचानक ठूलो बाढी प्रवेश गरेपछि त्रिशूली नदीको तटीय क्षेत्रमा उच्च सतर्कता अपनाउन जल तथा मौसम विज्ञान विभागले आग्रह गरेको छ। विभागले रसुवा, नुवाकोट, धादिङ र चितवनका नदी तटीय क्षेत्रलाई उच्च जोखिममा राखेको छ।

बाढी पूर्वानुमान शाखाका प्रमुख विनोद पराजुलीका अनुसार भदौ १० गते बिहान करिब ९ बजे तिब्बततर्फबाट ठूलो मात्रामा पानीको बहाव भोटेकोशी नदीमा प्रवेश गरेको हो। बाढी रसुवा हुँदै नुवाकोटको विदुरभन्दा तलसम्म पुगिसकेको छ। बाढीले माथिल्लो क्षेत्रमा ठूलो क्षति पुर्‍याएको प्रारम्भिक सूचना प्राप्त भएको उनले बताए।

मुग्लिनसम्म अति उच्च जोखिम, पाँच घण्टाभित्र बाढी पुग्नसक्ने

विभागका अनुसार त्रिशूली नदी हुँदै मर्स्याङ्दी नदीसँगको दोभान मुग्लिनसम्मको क्षेत्रलाई अति उच्च जोखिममा राखिएको छ। बाढी मुग्लिनसम्म पुग्न करिब चारदेखि पाँच घण्टा लाग्नसक्ने अनुमान गरिएको छ। त्यसैले आज बेलुकीसम्म नदी तटीय क्षेत्रमा विशेष सावधानी अपनाउन पराजुलीले आग्रह गरेका छन्।

बाढीको जोखिमलाई ध्यानमा राख्दै पृथ्वी राजमार्ग तथा त्रिशूली नदी किनारका अन्य प्रमुख सडकखण्डमा आवागमन नगर्न विभागले सुझाव दिएको छ। सम्भव भएसम्म जोखिमयुक्त क्षेत्रमा यातायातसमेत बन्द गर्न विभागले आग्रह गरेको छ।

त्रिशूली नदीमा पानीको सतह बढेसँगै तादी, बूढीगण्डकी र मलेखुलगायतका सहायक नदीमा समेत पानीको बहाव बढ्न वा पानी फर्किन सक्ने भएकाले ती क्षेत्रका बासिन्दालाई पनि सतर्क रहन आग्रह गरिएको छ।

वर्षाका कारण नभई आकस्मिक रूपमा ठूलो बाढी आएको देखिएकाले तिब्बत क्षेत्रमा हिमताल विस्फोट भएको हुनसक्ने आशंका गरिएको छ। यद्यपि बाढीको वास्तविक कारणबारे अहिलेसम्म यकिन विवरण सार्वजनिक भएको छैन।

बाढीको स्रोत र कारणबारे थप जानकारी लिन चिनियाँ अधिकारीसँग समन्वय भइरहेको तथा उपग्रहबाट समेत अध्ययन भइरहेको बाढी पूर्वानुमान शाखाका प्रमुख पराजुलीले जानकारी दिए।

Read More

काठमाडौं। गत वर्ष असारमा लेन्दे खोलामा आएको बाढीले ठूलो क्षति पुर्‍याएको १४ महिनापछि रसुवामा फेरि ठूलो बाढी आएको छ। बाढीका कारण टिम्बुरे भन्सारमा राखिएका गाडीमा ठूलो क्षति पुगेको रसुवा प्रहरीले जनाएको छ। क्षतिको विस्तृत विवरण संकलन भइरहेको प्रहरीले जनाएको छ।

गत असार २३ गते नेपाल–चीन सीमास्थित रसुवागढी क्षेत्रमा भोटेकोसी खोलामा आएको बाढीपहिरोले ठूलो जनधनको क्षति गरेको थियो। लेन्दे खोला उर्लिएपछि भोटेकोसीमा आएको बाढीबाट १९ जनाको मृत्यु भएको थियो। बाढीका कारण नेपाल–चीन जोड्ने मितेरी पुलसमेत बगेपछि रसुवागढी नाकाबाट हुने व्यापार अझै सहज हुन सकेको छैन।

हाल भोटेकोसी नदीमा बाढीको बहाव उच्च रहेकाले जिल्ला प्रशासन कार्यालय रसुवाले नदी तटीय क्षेत्रका बासिन्दालाई सुरक्षित स्थानमा रहन आग्रह गरेको छ। रसुवासहित नुवाकोट, धादिङ, गोरखा र चितवन हुँदै बग्ने नदीका तटीय क्षेत्रमा रहेका बासिन्दालाई सतर्कता अपनाउँदै सुरक्षित स्थानमा बस्न प्रशासनले अनुरोध गरेको हो।

राष्ट्रिय विपद् जोखिम न्यूनीकरण तथा व्यवस्थापन प्राधिकरणले बुधबार बिहान करिब साढे ९ बजे जारी गरेको सूचनामा जिल्ला प्रशासन कार्यालय रसुवाका अनुसार भोटेकोसी नदीमा पानीको बहाव उच्च रहेको उल्लेख गरिएको छ। प्राधिकरणले रसुवा, नुवाकोट, धादिङ, गोरखा र चितवन जिल्लाका नदी तटीय क्षेत्रका बासिन्दालाई सतर्कता अपनाउन तथा सम्भावित जोखिमबाट बच्न सुरक्षित स्थानमा बस्न आग्रह गरेको छ।

Read More

काठमाडौं । प्रधानमन्त्री वालेन्द्र शाहले आज प्रतिनिधिसभाको बैठकमा सांसदहरूले सोधेका प्रश्नको जवाफ दिने भएका छन्। सङ्घीय संसद् सचिवालयका अनुसार दिउँसो १ बजे बस्ने बैठकमा प्रतिनिधिसभा नियमावली, २०८३ को परिच्छेद–९ अनुसार सांसदहरूले दर्ता गराएका प्रश्नको प्रधानमन्त्री शाहले जवाफ दिने सम्भावित कार्यसूची रहेको छ।

बैठकमा प्रधानमन्त्री शाहले मुस्लिम आयोगको सातौँ वार्षिक प्रतिवेदन, आर्थिक वर्ष २०८१/८२ प्रस्तुत गर्नेछन्। यस्तै, ऊर्जा, जलस्रोत तथा सिँचाइमन्त्री विराजभक्त श्रेष्ठले नेपाल र भारतबीच दीर्घकालीन विद्युत् व्यापारसम्बन्धी सम्झौता प्रस्तुत गर्ने कार्यसूची रहेको छ।

प्रधानमन्त्रीसँग प्रश्न गर्न ११ सांसदको प्रश्न दर्ता

प्रधानमन्त्री शाहसँग प्रश्नोत्तरका लागि ११ जना सांसदले आफ्ना प्रश्न दर्ता गराएका छन्। अधिकतम १५ वटासम्म प्रश्न दर्ता गर्न सकिने भए पनि सत्तारूढ दल राष्ट्रिय स्वतन्त्र पार्टी (रास्वपा) का सांसदले आफ्नो तोकिएको कोटाअनुसार प्रश्न दर्ता गराएका छैनन्।

संसद् सचिवालयका अनुसार रास्वपाका सांसदले सातवटासम्म प्रश्न दर्ता गर्न पाउने भए पनि तीनवटा प्रश्न मात्रै दर्ता गरेका छन्। अन्य दलका तर्फबाट भने तोकिएको कोटाअनुसार नै प्रश्न दर्ता भएको संसद् सचिवालयले जनाएको छ।

सभामुख डोलप्रसाद अर्यालले प्रश्नोत्तरको समय तोक्दै भदौ ५ गतेभित्र प्रश्न दर्ता गर्न सांसदहरूलाई निर्देशन दिएका थिए। सोहीअनुसार रास्वपाबाट अमरेशकुमार सिंह, कृष्णहरि बुढाथोकी र समीक्षा बाँस्कोटाले प्रश्न दर्ता गराएका छन्।

नेपाली कांग्रेसबाट बासना थापा र गीता गुरुङ तथा नेकपा (एमाले) बाट ऐनबहादुर महर र गणेशसिंह ठगुन्नाले प्रधानमन्त्रीलाई प्रश्न सोध्ने भएका छन्। नेपाली कम्युनिस्ट पार्टी (नेकपा) बाट वर्षमान पुन र प्रमेश हमालले पनि प्रश्न दर्ता गराएका छन्।

यस्तै, श्रम संस्कृति पार्टीका हर्कराज राई र राष्ट्रिय प्रजातन्त्र पार्टीकी खुश्बु ओलीले प्रधानमन्त्री शाहलाई प्रश्न सोध्ने तयारी गरेका छन्।

यसअघि भदौ १ गते बसेको प्रतिनिधिसभा बैठकमा सभामुख डोलप्रसाद अर्यालले प्रधानमन्त्री शाहलाई सांसदहरूले सोधेका प्रश्नको जवाफ दिन रुलिङ गरेका थिए। सोहीअनुसार आजको बैठकमा प्रधानमन्त्री शाहले सांसदका प्रश्नको जवाफ दिने कार्यसूची तय गरिएको हो।

Read More

काठमाडौं। नेपाल सुनचाँदी व्यवसायी महासङ्घका अनुसार आज छापावाल सुनको मूल्य प्रतितोला ३ लाख २२ हजार २ सय रुपैयाँ कायम भएको छ।

सोमबार छापावाल सुन प्रतितोला ३ लाख २२ हजार ७ सय रुपैयाँमा कारोबार भएको थियो। आज सुनको मूल्य प्रतितोला ५ सय रुपैयाँ घटेको हो।

त्यस्तै, चाँदीको मूल्य पनि घटेको छ। सोमबार प्रतितोला ४ हजार ९ सय ६५ रुपैयाँ रहेको चाँदीको मूल्य आज ४ हजार ९ सय रुपैयाँ कायम भएको महासङ्घले जनाएको छ।

Read More

काठमाडौं । सरकारले लामो समयदेखि समस्याग्रस्त रहेको उदयपुर सिमेन्ट उद्योगलाई पुनः सञ्चालनमा ल्याउने प्रक्रिया अघि बढाएको छ। उद्योग सञ्चालनका लागि महत्वपूर्ण मानिएको चुनढुंगा तथा रातोमाटो उत्खनन अनुमतिपत्र पुनः जारी गर्न मन्त्रिपरिषद्ले स्वीकृति दिएको छ।

उदयपुर सिमेन्टको चुनढुंगा उत्खनन अनुमतिपत्र यसअघि २०८१ असोजमा रद्द गरिएको थियो। तत्कालीन प्रधानमन्त्री केपी शर्मा ओली नेतृत्वको सरकारको पालामा अनुमतिपत्र रद्द भएपछि उद्योगको सञ्चालन थप प्रभावित बनेको थियो।

उद्योग, वाणिज्य तथा आपूर्ति मन्त्रालयले २०८१ फागुन १ गते उदयपुर सिमेन्ट उद्योगलाई पत्र पठाउँदै खानी तथा खनिज पदार्थ नियमावली, २०५६ अनुसार अनुमतिपत्र रद्द गरिएको जानकारी दिएको थियो।

मन्त्रिपरिषद्ले खोल्यो उद्योग सञ्चालनको बाटो

सरकारले १८ असार २०८३ मा गरेको निर्णयमार्फत उदयपुर सिमेन्ट उद्योगको साविकमा रद्द भएको चुनढुंगा तथा रातोमाटो उत्खनन अनुमतिपत्र पुनः जारी गर्ने बाटो खोलेको हो।

मन्त्रिपरिषद्ले खानी तथा खनिज पदार्थ ऐन, २०४२ को दफा १२ को उपदफा (३) बमोजिम अनुमतिपत्र जारी गर्न खानी तथा भूगर्भ विभागलाई स्वीकृति दिएको छ।

त्यस्तै, उद्योगले खानी तथा भूगर्भ विभागलाई तिर्न बाँकी रहेको ७४ लाख ९७ हजार ३३१ रुपैयाँ ९५ पैसा सरकारले नै उपलब्ध गराउने निर्णयसमेत भएको छ।

सरकारको निर्णयअनुसार उदयपुर सिमेन्ट उद्योगले तिर्नुपर्ने बक्यौता रकमसमेत राज्यले बेहोर्ने भएको छ। स्रोतका अनुसार मन्त्रिपरिषद्को निर्णय कार्यान्वयन गर्दै अर्थ मन्त्रालयले उक्त रकम खानी तथा भूगर्भ विभागलाई उपलब्ध गराइसकेको छ।

यससँगै उद्योगलाई पुनः सञ्चालनमा ल्याउन आवश्यक प्रशासनिक र कानुनी प्रक्रिया अघि बढाउने वातावरण बनेको छ।

महाप्रबन्धक नियुक्त गरेर पूर्ण क्षमतामा चलाउने योजना

सरकारले अब उदयपुर सिमेन्ट उद्योगका लागि महाप्रबन्धक नियुक्त गर्ने तयारी गरेको छ। त्यसपछि उद्योगलाई पूर्ण क्षमतामा सञ्चालन गर्ने योजना सरकारको छ।

हाल उद्योगको दैनिक उत्पादन क्षमता ८०० मेट्रिक टन रहेको छ। उद्योगलाई नियमित रूपमा सञ्चालन गरेर उत्पादन क्षमता उपयोग गर्ने सरकारको लक्ष्य रहेको बताइएको छ।

उदयपुर सिमेन्ट उद्योग २०४४ सालमा जापान सरकारको आर्थिक तथा प्राविधिक सहयोगमा स्थापना भएको थियो। आर्थिक वर्ष २०७३/७४ मा यो नेपालकै ठूलो सिमेन्ट उद्योग कम्पनीका रूपमा स्थापित भएको थियो।

उदयपुरको त्रियुगा नगरपालिका–११, जलजलेमा रहेको उद्योगका लागि आवश्यक चुनढुंगा उत्तरी क्षेत्रको सुकौराबाट रोपवेमार्फत ल्याउने पूर्वाधार निर्माण गरिएको छ।

एसियाकै ठूला सिमेन्ट उद्योगमध्ये एक मानिने उदयपुर सिमेन्टलाई पुनः पूर्ण क्षमतामा सञ्चालन गर्ने सरकारको प्रयास सफल भएमा लामो समयदेखि समस्यामा रहेको सरकारी उद्योग पुनर्जीवित हुने अपेक्षा गरिएको छ।

Read More

काठमाडौं । बागमती प्रदेशका मुख्यमन्त्री किरण थापामगरको नियुक्तिलाई चुनौती दिँदै दायर भएका दुई छुट्टाछुट्टै रिटमा उच्च अदालत पाटनको हेटौँडा इजलासले विपक्षीका नाममा कारण देखाऊ आदेश जारी गरेको छ। अदालतले अन्तरिम आदेश दिने वा नदिने विषयमा छलफल गर्न दुवै पक्षलाई भदौ १० गते बोलाएको छ।

न्यायाधीश बबिता उप्रेतीको एकल इजलासले सोमबार रिटमाथि प्रारम्भिक सुनुवाइ गर्दै विपक्षीलाई लिखित जवाफ पेस गर्न आदेश दिएको हो। निवेदकहरूले तत्काल अन्तरिम आदेश माग गरे पनि अदालतले त्यसबारे तत्काल निर्णय नगरी दुवै पक्षलाई छलफलमा बोलाएको छ।

दुई जनाले दायर गरे छुट्टाछुट्टै रिट

राष्ट्रिय प्रजातन्त्र पार्टी (राप्रपा) बागमती प्रदेश संसदीय दलकी प्रमुख सचेतक कुमारी तामाङ र अधिवक्ता मोहनप्रसाद ढकालले मुख्यमन्त्री थापामगरको नियुक्ति बदर गर्न माग गर्दै छुट्टाछुट्टै रिट दायर गरेका हुन्। दुवै निवेदनमा तत्काल अन्तरिम आदेशको माग गरिए पनि अदालतले भदौ १० गते दुवै पक्षको उपस्थितिमा यसबारे छलफल गर्ने भएको छ।

विपक्षीलाई १५ दिनभित्र जवाफ दिन आदेश

अदालतले निवेदकले माग गरेअनुसार आदेश जारी गर्नुपर्ने हो वा होइन भन्ने विषयमा आधार, प्रमाण र कारणसहित बाटाको म्यादबाहेक १५ दिनभित्र लिखित जवाफ पेस गर्न विपक्षीहरूलाई आदेश दिएको छ।

रिटमा बागमती प्रदेश प्रमुखको कार्यालय, प्रदेश प्रमुख दीपकप्रसाद देवकोटा, मुख्यमन्त्री तथा मन्त्रिपरिषद्को कार्यालय, प्रदेश सभा, सभामुख तथा सम्बन्धित राजनीतिक दल र संसदीय दलका नेताहरूलाई विपक्षी बनाइएको छ।

प्रदेश प्रमुख र प्रदेश प्रमुखको कार्यालयका तर्फबाट उच्च सरकारी वकिल कार्यालय हेटौँडा तथा मुख्यमन्त्री तथा मन्त्रिपरिषद्को कार्यालय, प्रदेश सभा र सभामुखका तर्फबाट मुख्य न्यायाधिवक्ताको कार्यालय, बागमती प्रदेशमार्फत लिखित जवाफ पेस गर्न भनिएको छ।

मुख्यमन्त्री नियुक्तिको आधार बनेको समर्थनमा विवाद

निवेदकहरूले थापामगरलाई मुख्यमन्त्री नियुक्त गर्ने आधारका रूपमा प्रस्तुत गरिएको समर्थन नै विवादित रहेको दाबी गरेका छन्। उनीहरूका अनुसार उक्त समर्थनलाई मान्यता दिएर मुख्यमन्त्री नियुक्त गर्ने प्रक्रिया संविधानसम्मत छैन।

रिट निवेदनमा राप्रपाका तत्कालीन बागमती प्रदेश संसदीय दलका नेता उद्धव थापाले नेकपा (एमाले) का थापामगरलाई मुख्यमन्त्री बनाउन पार्टीको निर्णय तथा निर्देशनविपरीत समर्थन गरेको उल्लेख छ। सोही समर्थनलाई आधार बनाएर मुख्यमन्त्री नियुक्त गरिएको निवेदकहरूको दाबी छ।

राप्रपा केन्द्रीय समितिले तत्कालीन संसदीय दलका नेता थापाले दिएको समर्थन पार्टीको आधिकारिक नभएको जानकारी प्रदेश प्रमुखको कार्यालयलाई गराएको भए पनि त्यसलाई मान्यता दिइएको दाबीसमेत रिटमा गरिएको छ।

भदौ ४ मा मुख्यमन्त्री नियुक्त भएका थिए थापामगर

एमाले, नेपाली कम्युनिस्ट पार्टी र राप्रपाका प्रदेश सभा सदस्यको समर्थनसहित एमालेका थापामगरले भदौ ३ गते मुख्यमन्त्री पदमा दाबी पेस गरेका थिए। प्रदेश प्रमुख देवकोटाले भदौ ४ गते उनलाई मुख्यमन्त्री नियुक्त गर्दै पद तथा गोपनीयताको शपथ गराएका थिए।

अब भदौ १० गते हुने छलफल तथा विपक्षीबाट प्राप्त हुने लिखित जवाफका आधारमा अदालतले अन्तरिम आदेशका विषयमा निर्णय गर्नेछ।

Category: राजनीति / कानुनी विवाद
Subcategory: बागमती प्रदेश

Read More