काठमाडौं । राष्ट्रिय स्वतन्त्र पार्टी (रास्वपा)को महाधिवेशनमा केन्द्रीय सदस्य चयनका लागि निर्वाचन प्रक्रिया अगाडि बढेसँगै महाधिवेशनस्थलमा चुनावी गतिविधि तीव्र बनेको छ। उम्मेदवारी दिएका नेता, तिनका समर्थक तथा शुभेच्छुकहरू बिहानैदेखि प्रतिनिधिहरूसँग भेटघाट गर्दै मत माग्न सक्रिय देखिएका छन्।
महाधिवेशनस्थल वरपर प्रचारप्रसारको चहलपहल बढेको छ। उम्मेदवारहरूले आफ्ना पक्षमा मत आकर्षित गर्न विभिन्न माध्यमबाट प्रचार अभियान सञ्चालन गरिरहेका छन्। अत्यधिक गर्मीका बाबजुद मन्त्री, सांसद तथा पार्टीका अन्य नेताहरू पनि चुनावी दौडधुपमा व्यस्त छन्।
पार्टीको केन्द्रीय निर्वाचन आयोगले उम्मेदवारहरूको अन्तिम सूची सार्वजनिक गरिनसकेकाले प्रतिस्पर्धामा कति मन्त्री सहभागी छन् भन्ने यकिन नभए पनि केही मन्त्रीहरू प्रतिनिधिहरूसँग प्रत्यक्ष सम्पर्कमा रहेर मत मागिरहेका छन्। उम्मेदवारका समर्थकहरूले प्रचार सामग्री वितरण गर्दै आफ्नो पक्षमा माहोल बनाउन प्रयास गरिरहेका छन्।
रास्वपाका केन्द्रीय सदस्य राजन गौतमका अनुसार निर्वाचनलाई लक्षित गर्दै उम्मेदवारहरूले केही दिनयता निरन्तर प्रचार अभियान चलाइरहेका छन्। उनका अनुसार निर्वाचनका बेला नेताहरूले फोनमार्फत समेत मत माग्नु सामान्य प्रक्रिया हो। उनले महाधिवेशन परिसरभित्र पर्चा तथा पम्प्लेटजस्ता प्रचार सामग्री प्रयोगमा रोक लगाइएको भए पनि अन्य माध्यमबाट प्रचार जारी रहेको बताए।
रास्वपाको विधानअनुसार सभापति र केन्द्रीय सदस्यका लागि पहिलो चरणमा निर्वाचन हुने व्यवस्था छ। निर्वाचित केन्द्रीय सदस्यहरूले मात्र दोस्रो चरणका अन्य पदमा उम्मेदवारी दिन पाउने भएकाले केन्द्रीय सदस्यको निर्वाचनलाई विशेष महत्वका साथ हेरिएको रास्वपा चितवनका सचिव तेजेन्द्र पौडेलले बताए।
महाधिवेशनमा चार हजारभन्दा बढी प्रतिनिधिले मतदान गर्ने अपेक्षा गरिएको छ। ९९ निर्वाचित केन्द्रीय सदस्य पदका लागि ४०० भन्दा बढी उम्मेदवारी परेकाले प्रतिस्पर्धा निकै कडा हुने देखिएको छ। विद्युतीय मतदान प्रणालीमार्फत निर्वाचन हुने र विभिन्न क्लस्टरका आधारमा सदस्य चयन गरिने व्यवस्थाका कारण परिणाम अझ रोचक र पेचिलो बन्ने विश्लेषण गरिएको छ।
राजनीतिक विश्लेषकहरूका अनुसार पार्टीका प्रदेशस्तरीय निर्वाचनमा यसअघि केही चर्चित नेता तथा सांसदसमेत पराजित भएका कारण यसपटक पदमा रहेका नेताहरू चुनावी प्रचारमा बढी सक्रिय देखिएका हुन्।
Read More
