काठमाडौं । मुस्ताङसहित विभिन्न स्थानमा सशस्त्र प्रहरी बलले नियन्त्रणमा लिएका चिनियाँ कम्पनी बीवाईडी का ७७५ विद्युतीय सवारीसाधन फुकुवा गरिएको छ। करिब दुई सातासम्म नियन्त्रणमा रहेका ती सवारीसाधन आइतबार साँझदेखि सम्बन्धित पक्षको जिम्मा लगाइएपछि गन्तव्यतर्फ पठाउन सुरु गरिएको हो।
सशस्त्र प्रहरी बल नेपाल को ३३ नम्बर गुल्म, जोमसोमका अनुसार केन्द्रीय निर्देशनअनुसार नियन्त्रणमा लिइएका सबै सवारीसाधन फुकुवा गरिएको हो।
गत जेठको दोस्रो र तेस्रो सातामा कोरलानाका हुँदै नेपाल भित्रिएका ती विद्युतीय सवारीसाधनमध्ये ६४९ वटाको मुस्ताङ भन्सार कार्यालय नेचुङले भन्सार जाँचपास गरिसकेको थियो। बाँकी सवारीसाधनको भन्सार तथा आयात प्रक्रियामा कैफियत हुनसक्ने आशङ्कामा सुरक्षाकर्मीले नियन्त्रणमा लिएका थिए।
ती सबै सवारीसाधन साइमोन इङ्क मार्फत आयात गरिएको बताइएको छ।
यस विषयमा स्पष्टता ल्याउन अर्थ मन्त्रालयले भन्सार विभाग, नीति तथा सञ्चालन महाशाखाअन्तर्गत मूल्याङ्कन शाखा प्रमुख निर्देशक भुपालराज शाक्यको संयोजकत्वमा तीन सदस्यीय छानबिन समिति गठन गरेको थियो। समितिले जेठ २१ गते कास्की, पर्वत तथा मुस्ताङको जोमसोम र कोरलानाकामा स्थलगत अनुगमन गर्दै अनुसन्धान सुरु गरेको थियो।
छानबिन समितिको प्रारम्भिक प्रतिवेदनअनुसार कोरलानाका हुँदै भित्रिएका विद्युतीय सवारीसाधनमा कुनै पनि प्रकारको कैफियत नदेखिएको निष्कर्ष निकालिएको छ।
यसअघि सशस्त्र प्रहरीले कास्कीको हेमजामा ९८ र पर्वतको कुश्मामा १७ सवारीसाधन नियन्त्रणमा लिएको थियो। त्यस्तै मुस्ताङको लोमान्थाङ हुँदै जोमसोम ल्याइएका २६६ र कोरलानाकामै रोकिएका ३९४ सवारीसाधन पनि नियन्त्रणमा रहेका थिए।
फुकुवा भएपछि जोमसोम बसपार्कमा राखिएका २६६ सवारीसाधनमध्ये आइतबार र सोमबार गरी २२३ वटा गन्तव्यतर्फ पठाइसकिएको सशस्त्र प्रहरीले जनाएको छ। हाल त्यहाँ ४३ सवारीसाधन मात्र बाँकी रहेका छन्।
त्यसैगरी कोरलानाकामा रोकिएका र भन्सार जाँचपास भएका सवारीसाधनलाई क्रमशः गन्तव्यतर्फ लैजाने प्रक्रिया अघि बढाइएको छ। जाँचपास नभएका सवारीसाधनको पनि आवश्यक भन्सार प्रक्रिया पूरा भएपछि गन्तव्यतर्फ लैजान कुनै समस्या नरहेको सशस्त्र प्रहरीले स्पष्ट पारेको छ।
