काठमाडौं । नाइजेरियाको ओन्डो राज्यमा सैन्य विमान दुर्घटना हुँदा विमानमा सवार ३२ जनाको मृत्यु भएको छ। राष्ट्रपति बोला टिनुबुले सोमबार दुर्घटनामा २५ यात्रु र सात चालक दलका सदस्यको मृत्यु भएको पुष्टि गरेका हुन्।

उड्डयन तथा एरोस्पेस विकासमन्त्री फेस्टस केयामोका अनुसार विमान ओन्डो राज्यको नदी किनारमा रहेको इग्बोकाडा समुदायको नौसैनिक आधारनजिक दुर्घटनामा परेको थियो।

नाइजेरियाली वायुसेनाका अनुसार सुरुमा हेलिकप्टर दुर्घटनाको अनुमान गरिए पनि दुर्घटनामा परेको विमान दुई इन्जिनयुक्त टर्बोप्रप विमान रहेको पुष्टि भएको छ।

विमान दक्षिणी नाइजेरियाको बेनिन सहरबाट लागोसतर्फ नियमित उडानमा रहेका बेला दुर्घटनामा परेको बताइएको छ।

राष्ट्रपति टिनुबुले घटनाप्रति दुःख व्यक्त गर्दै दुर्घटनामा ज्यान गुमाएका वायुसेनाका सदस्यहरूको योगदानलाई राष्ट्रले सधैँ सम्झिरहने बताएका छन्। उनले दुर्घटनापछि तत्काल खोज तथा उद्धार अभियान सञ्चालन गरेकोमा वायुसेनाको प्रशंसा पनि गरेका छन्।

राष्ट्रपति कार्यालयले घटनालाई नाइजेरियाली सशस्त्र बल र सम्पूर्ण राष्ट्रका लागि गम्भीर दुःखको क्षणका रूपमा उल्लेख गरेको छ।

Read More

काठमाडौं । नेपाली कांग्रेसको १५औँ महाधिवेशनमा उम्मेदवारी दर्ताका लागि थप दुई घण्टा समय दिइएको छ। केन्द्रीय निर्वाचन समितिले मंगलबार साँझ ६ बजेसम्म उम्मेदवारी दर्ता गर्न सकिने गरी समय बढाएको हो।

यसअघि उम्मेदवारी दर्ताका लागि मंगलबार अपराह्न ४ बजेसम्मको समय तोकिएको थियो। निर्धारित समयभित्र उम्मेदवारी दर्ता गर्ने क्रम जारी रहेपछि निर्वाचन समितिले समय थप गरेको हो।

समितिका सदस्यसचिव राजु कटुवालले उम्मेदवारी दर्ताको नयाँ समयसीमा साँझ ६ बजेसम्म कायम गरिएको जानकारी दिएका छन्।

महाधिवेशनअन्तर्गत विभिन्न पदमा उम्मेदवारी दर्ता गर्ने प्रक्रिया अहिले चलिरहेको निर्वाचन समितिले जनाएको छ।

Read More

काठमाडौं । प्रस्तावित राजदूतहरूको संसदीय सुनुवाइ दसैँअघि नै सम्पन्न गर्ने निर्णय भएको छ। संसदीय सुनुवाइ समितिले असोज २६, २७ र २८ गते सुनुवाइ गर्ने गरी कार्यतालिका तय गरेको हो।

मंगलबार सिंहदरबारमा बसेको समितिको बैठकले १३ देशका लागि प्रस्तावित राजदूतहरूको सुनुवाइ प्रक्रिया अघि बढाउने निर्णय गरेको हो। सरकारले असोज २ गतेको मन्त्रिपरिषद् बैठकबाट भारत, चीन, अमेरिका लगायतका देशका लागि राजदूत सिफारिस गरेको थियो।

बैठकमा सुनुवाइको मिति तय गर्ने विषयमा सांसदहरूबीच लामो छलफल भएको थियो। केही सदस्यले दसैँको समय र आफ्नो जिल्ला भ्रमणको पूर्वनिर्धारित कार्यक्रमलाई कारण देखाउँदै सुनुवाइ चाडपर्वपछि गर्नुपर्ने धारणा राखेका थिए।

तर विभिन्न मुलुकमा राजदूतको पद रिक्त रहँदा त्यसले पारेको प्रभाव र कूटनीतिक आवश्यकतालाई ध्यानमा राख्दै प्रक्रिया ढिला गर्न नहुने निष्कर्षमा समिति पुगेको हो।

समितिका सदस्यहरूले प्रस्तावित राजदूतहरूको सुनुवाइलाई औपचारिक प्रक्रिया मात्र नबनाउने बताएका छन्। सम्बन्धित व्यक्तिको योग्यता, क्षमता र प्रस्तावित जिम्मेवारीसँगको उपयुक्तताबारे आवश्यक परीक्षण गरेर प्रक्रिया अघि बढाउने प्रतिबद्धता उनीहरूले जनाएका छन्।

Read More

काठमाडौं । दसैँमा घर फर्किने यात्रुका लागि असोज २३ गतेदेखि अग्रिम टिकट बुकिङ खुला गरिने भएको छ। यात्रुको चाप व्यवस्थापन गर्दै सहज र सुरक्षित आवागमन सुनिश्चित गर्ने उद्देश्यले यातायात व्यवस्था विभागले यस्तो तयारी गरेको हो।

यातायात व्यवस्था विभागमा नेपाल यातायात व्यवसायी राष्ट्रिय महासङ्घका अध्यक्ष पुण्यप्रसाद सिटौलासहित व्यवसायी तथा विभागका महानिर्देशक राजीव पोखरेललगायत पदाधिकारीबीच बसेको बैठकले अग्रिम बुकिङ खोल्ने निर्णय गरेको हो।

बैठकपछि महानिर्देशक पोखरेलले दसैँमा राजधानीबाट बाहिरी जिल्लातर्फ जाने यात्रुको संख्या बढ्ने भएकाले त्यसअनुसार यातायात व्यवस्थापनको तयारी अघि बढाइएको जानकारी दिए।

उनका अनुसार यात्रुको चापलाई ध्यानमा राखेर पर्याप्त सवारीसाधन व्यवस्थापन, टिकट वितरण र यात्रु सेवासम्बन्धी व्यवस्था मिलाइनेछ। यात्रुलाई गन्तव्यसम्म सहज रूपमा पुर्‍याउन यातायात व्यवसायी, सम्बन्धित सरकारी निकाय र सुरक्षा निकायबीच आवश्यक समन्वयसमेत गरिने विभागले जनाएको छ।

दसैँको समयमा टिकट अभाव, अव्यवस्थित यात्रा तथा यात्रुले अनावश्यक सास्ती भोग्न नपरोस् भन्ने उद्देश्यले अग्रिम टिकट बुकिङसहित यातायात व्यवस्थापनको तयारीलाई प्राथमिकता दिइएको विभागको भनाइ छ।

विभागले यात्रुको बढ्दो चापअनुसार सेवा व्यवस्थापन गर्दै सुरक्षित र व्यवस्थित रूपमा आवतजावत गर्ने वातावरण तयार पार्ने जनाएको छ।

Read More

काठमाडौं । बाढी तथा अन्य विपद्मा बेपत्ता भएका व्यक्तिलाई कानुनी रूपमा मृत्यु घोषणा गर्न सहज हुने गरी सरकारले कानुन संशोधनको तयारी थालेको छ। कानुन, न्याय तथा संसदीय मामिलामन्त्री सोविता गौतमले विद्यमान व्यवस्थामा आवश्यक संशोधनका लागि प्रक्रिया अघि बढाइएको जानकारी दिएकी हुन्।

मंगलबार सिंहदरबारमा बसेको जलवायु परिवर्तन, जलवायु न्याय तथा भोटेकोशी–त्रिशुली विपद्सम्बन्धी संसदीय विशेष समिति बैठकमा मन्त्री गौतमले बेपत्ता व्यक्तिको मृत्यु घोषणा र मृत्यु दर्तासम्बन्धी कानुनी समस्या समाधान गर्न मूल कानुनमै संशोधन आवश्यक रहेको बताइन्।

उनका अनुसार यस विषयमा राष्ट्रिय विपद् जोखिम न्यूनीकरण तथा व्यवस्थापन प्राधिकरण र कानुन मन्त्रालयबीच छलफल भइरहेको छ। संसद्को अधिवेशन अन्त्य भइसकेकाले तत्काल व्यवस्था गर्नुपर्ने अवस्था आए अध्यादेशमार्फत देवानी संहिता, पञ्जीकरण ऐन वा विपद्सम्बन्धी कानुन संशोधन गर्ने विकल्पमा सरकार अघि बढिरहेको उनले बताइन्।

हालै भोटेकोशी क्षेत्रमा आएको बाढीले विपद् व्यवस्थापनलाई राज्यका सबै नीति र कामकारबाहीको केन्द्रमा राख्नुपर्ने आवश्यकता देखाएको मन्त्री गौतमको भनाइ छ। अब कानुन निर्माणदेखि कार्यान्वयनसम्म विपद् जोखिमलाई प्राथमिकतामा राख्नुपर्ने उनले बताइन्।

विपद्का विषयमा दीर्घकालीन समाधान खोज्न सर्वदलीय संयन्त्रमार्फत सम्बन्धित मन्त्रीहरूलाई छलफलमा सहभागी गराउनुपर्नेमा पनि उनले जोड दिइन्। यस्तो छलफलबाट विपद् व्यवस्थापन, कानुनी सुधार र प्रभावित परिवारले भोगिरहेका समस्याको समाधानका उपाय पहिचान गर्न सकिने उनको भनाइ थियो।

Read More

काठमाडौं । नेकपा (एमाले) ले पार्टीभित्रको अनुशासन कडाइ गर्ने, युवालाई निर्णायक जिम्मेवारीमा ल्याउने र जनतासँग संगठनको सम्बन्ध बलियो बनाउने रणनीतिसहित ‘अन्तरपार्टी निर्देशन–३’ (अपानि–३) जारी गरेको छ।

ललितपुरको भनिमण्डलस्थित रामबाग महलमा सम्पन्न तेस्रो केन्द्रीय कमिटी बैठकका निर्णय समेटेर जारी गरिएको निर्देशनमा नेतृत्व व्यवस्थापनदेखि निर्वाचनमा पार्टीले व्यहोरेको कमजोरीको समीक्षा र सरकारविरुद्धको प्रतिपक्षी रणनीतिसम्मका विषय समेटिएका छन्।

बैठकले अध्यक्ष केपी शर्मा ओलीको राजनीतिक प्रतिवेदन सर्वसम्मत रूपमा पारित गरेको थियो। उक्त प्रतिवेदनमा पार्टीको संगठन विस्तार भए पनि आम नागरिकसँगको प्रत्यक्ष सम्बन्ध कमजोर बन्दै गएको र बदलिँदो राजनीतिक तथा सामाजिक परिवेशअनुसार पार्टीको कार्यशैलीमा सुधार आवश्यक रहेको निष्कर्ष प्रस्तुत गरिएको छ।

एमालेले पार्टीभित्र गुटगत गतिविधि, अनुशासनहीनता तथा नेतृत्वविरुद्ध सार्वजनिक रूपमा अभिव्यक्ति दिने प्रवृत्तिलाई अब गम्भीर रूपमा लिने भएको छ। तेस्रो केन्द्रीय कमिटी बैठकलाई एउटा ‘कटअफ’ मानेर त्यसअघिका गतिविधि र अभिव्यक्तिलाई छुट दिने, तर त्यसपछि पार्टीको नीति, निर्णय वा नेतृत्वविरुद्ध सार्वजनिक अभिव्यक्ति आए कारबाही गर्ने नीति लिइएको छ।

त्यसका लागि संगठन विभाग र अनुशासन आयोगलाई आवश्यक प्रक्रिया अघि बढाउने जिम्मेवारी दिइएको छ।

भण्डारीलाई वरिष्ठ नेताको जिम्मेवारी

बैठकले पूर्वराष्ट्रपति तथा एमालेकी पूर्वउपाध्यक्ष विद्यादेवी भण्डारीलाई पार्टीको दोस्रो वरीयतामा रहने गरी वरिष्ठ नेताका रूपमा मनोनयन गर्ने निर्णय गरेको छ।

एमालेले पार्टी विधानमा देखिएको अवरोध हटाउँदै भण्डारीलाई उक्त जिम्मेवारी दिइएको जनाएको छ। यसबाहेक विभिन्न राजनीतिक दलबाट एमालेमा प्रवेश गरेका र पार्टीमा योगदान पुर्‍याएका केही नेताहरूलाई केन्द्रीय तथा स्थायी कमिटीमा मनोनयन गर्ने निर्णय पनि बैठकले गरेको छ।

निर्वाचनमा अपेक्षित परिणाम नआएको विषयलाई एमालेले संगठनको आन्तरिक कमजोरीसँग जोडेर समीक्षा गरेको छ। ओलीको राजनीतिक प्रतिवेदनमा पार्टीको सांगठनिक पहुँच व्यापक भए पनि जनताको दैनिक जीवनसँग जोडिने विषयमा प्रभावकारी उपस्थिति देखाउन नसकिएको उल्लेख छ।

विशेषगरी युवापुस्तासँगको सम्बन्ध, सामाजिक सञ्जाल तथा डिजिटल प्लेटफर्ममा पार्टीको प्रभाव र स्थानीय जनसरोकारका विषयलाई प्राथमिकतामा राख्न नसक्नु कमजोरीका रूपमा औंल्याइएको छ। विपक्षीहरूले डिजिटल माध्यमबाट फैलाएका सूचनाको प्रभावकारी प्रतिवाद गर्न नसक्नु पनि निर्वाचनमा पार्टीलाई क्षति पुग्नुको एउटा कारण भएको एमालेको निष्कर्ष छ।

अब भने पार्टीको संरचना र नेतृत्वलाई पुस्तान्तरणसँग जोड्ने नीति एमालेले अघि सारेको छ। ‘रूपान्तरण, हस्तान्तरण र पुस्तान्तरण’को अवधारणाअनुसार युवालाई संगठनमा उपस्थित गराउने मात्र नभई नीति निर्माण र निर्णय गर्ने तहमा समेत भूमिका दिने योजना बनाइएको छ।

तर नेतृत्व हस्तान्तरण केवल राजनीतिक नाराका आधारमा नभई क्षमता, विधि र योगदानका आधारमा गरिने एमालेले स्पष्ट पारेको छ।

जनतासँगको सम्बन्ध विस्तार गर्न पार्टीले ‘मिसन पार्टी जागरण’ सञ्चालन गर्ने भएको छ। वडा तहसम्म पुगेर स्थानीय समस्या पहिचान गर्ने र समाधानका लागि पहल गर्ने योजनासँगै आर्टिफिसियल इन्टेलिजेन्स, डिजिटल अर्थतन्त्र र गिग इकोनोमीलगायत नयाँ विषयमा पार्टीको नीतिगत धारणा निर्माण गर्ने तयारी पनि गरिएको छ।

सरकारमाथि प्रश्न, संसद् र सडकमा सक्रिय हुने तयारी

तेस्रो केन्द्रीय कमिटी बैठकले २२ वटा समसामयिक प्रस्तावसमेत पारित गरेको छ। प्रस्तावमार्फत एमालेले सरकारको कार्यशैलीप्रति असन्तुष्टि जनाउँदै विभिन्न राजनीतिक तथा सामाजिक विषयमा आफ्नो धारणा सार्वजनिक गरेको छ।

पूर्वप्रधानमन्त्री केपी शर्मा ओली र पार्टी उपाध्यक्ष विष्णुप्रसाद पौडेलको गिरफ्तारीलाई एमालेले राजनीतिक प्रतिशोधका रूपमा व्याख्या गरेको छ। भोटेकोशी बाढीलगायतका प्राकृतिक विपत्तिपछि उद्धार, राहत तथा पुनःस्थापनाको काम प्रभावकारी हुन नसकेको आरोप पनि उसले सरकारमाथि लगाएको छ।

सुकुम्बासी बस्तीमा सञ्चालन गरिएको डोजर अभियान, ट्रेड युनियन र स्वतन्त्र विद्यार्थी युनियनका अधिकार, सञ्चारमाध्यमको स्वतन्त्रता तथा नागरिक र अभियन्ताको गिरफ्तारीजस्ता विषय पनि एमालेका प्रस्तावमा समेटिएका छन्।

अब महँगी, बेरोजगारी, किसानका समस्या र जनजीविकासँग जोडिएका मुद्दालाई प्राथमिकतामा राखेर संसद् र सडक दुवैबाट सरकारमाथि दबाब बढाउने एमालेको तयारी छ।

राष्ट्रिय हित, संविधान र लोकतान्त्रिक व्यवस्थाको संरक्षणका विषयमा भने राजनीतिक दल, नागरिक समाज र बौद्धिक समुदायसँग संवाद तथा सहकार्य गर्न पार्टीले आह्वान गरेको छ। जनताका साझा सवालमा सहकार्य र राजनीतिक एकताका लागि समेत एमालेले अन्य पक्षलाई आग्रह गरेको छ।

Read More

काठमाडौँ । सरकारी तथा सार्वजनिक जग्गा संरक्षण गर्ने अभियानअन्तर्गत काठमाडौं महानगरपालिका–४ मा रहेको ११२ रोपनी जग्गा नेपाल सरकारको नाममा कायम गरिएको छ।

सरकारी तथा सार्वजनिक जग्गा छानबिन एवं संरक्षणसम्बन्धी उच्चस्तरीय आयोग (रावल आयोग), २०५२ को प्रतिवेदन कार्यान्वयन गर्ने क्रममा उक्त जग्गा सरकारको नाममा ल्याइएको हो।

भूमि प्रशासन कार्यालय डिल्लीबजारले रावल आयोगको प्रतिवेदनमा सरकारी तथा सार्वजनिक जग्गाका रूपमा उल्लेख गरिएको क्षेत्रफल छुट्याएर सम्बन्धित कित्ताबाट कट्टा गरी नेपाल सरकारको नाममा कायम गरेको जनाएको छ।

रावल आयोगले २०५२ सालमा सरकारी तथा सार्वजनिक जग्गाको अवस्था अध्ययन गरी अतिक्रमणमा परेका तथा व्यक्तिका नाममा दर्ता भएका जग्गा पहिचान गर्दै तिनलाई संरक्षण गर्न सरकारलाई सुझावसहित प्रतिवेदन बुझाएको थियो। लामो समयपछि सरकारले उक्त प्रतिवेदन कार्यान्वयनमा ल्याएको हो।

प्रतिवेदन कार्यान्वयनका लागि भूमि व्यवस्था, सहकारी, संघीय मामिला तथा सामान्य प्रशासन मन्त्रालयले समिति गठन गरेको छ। प्रमुख नापी अधिकृत रमेश ज्ञवालीको संयोजकत्वमा गठित समितिमा गृह मन्त्रालय र भौतिक पूर्वाधार तथा यातायात मन्त्रालयका उपसचिव, सम्बन्धित भूमि प्रशासन तथा नापी कार्यालयका प्रमुख, स्थानीय तह समन्वय शाखा प्रमुख, भूमि व्यवस्थापन तथा अभिलेख विभागका शाखा अधिकृत र नापी विभागका नापी अधिकृत सदस्यसचिव रहेका छन्।

समितिले रावल आयोगको प्रतिवेदनमा सरकारी तथा सार्वजनिक जग्गा अतिक्रमण भएको उल्लेख भएका कित्ताहरूबाट अतिक्रमित भनिएको क्षेत्रफल छुट्याएर एकमुष्ट रूपमा नेपाल सरकारको नाममा कायम गर्ने प्रक्रिया अघि बढाएको छ।

सरकारले आयोगको प्रतिवेदनमा औंल्याइएका सरकारी तथा सार्वजनिक जग्गाको छानबिन गरी क्रमशः सरकारको नाममा ल्याउने प्रक्रिया अघि बढाएको जनाएको छ।

Read More

काठमाडौँ । स्थानीय बजारमा आज सुनको मूल्य स्थिर रहेको छ भने चाँदीको मूल्य प्रतितोला १५ रुपैयाँले घटेको छ।

नेपाल सुनचाँदी व्यवसायी महासङ्घका अनुसार मंगलबार छापावाल सुन प्रतितोला २ लाख ९१ हजार ५०० रुपैयाँमा कारोबार भइरहेको छ।

त्यस्तै, चाँदीको मूल्य प्रतितोला ४ हजार ४१५ रुपैयाँ कायम भएको महासङ्घले जनाएको छ।

Read More

काठमाडौँ । राष्ट्रिय वाणिज्य बैंकले ३ अर्ब रुपैयाँ बराबरको ऋणपत्र निष्काशन गर्ने भएको छ।

बैंकले वार्षिक ६ प्रतिशत ब्याजदर प्रदान गर्ने गरी ‘आरबीबीएल डिबेन्चर २०८९’ निष्काशन गर्न लागेको हो।

बैंकले असोज २९ गतेदेखि प्रतिकित्ता १ हजार रुपैयाँ अंकित मूल्यका कुल ३० लाख कित्ता ऋणपत्र बिक्रीमा ल्याउनेछ। यसअनुसार ऋणपत्रको कुल निष्काशन रकम ३ अर्ब रुपैयाँ हुनेछ।

कुल निष्काशनमध्ये ६० प्रतिशत अर्थात् १ अर्ब ८० करोड रुपैयाँ बराबरका १८ लाख कित्ता ऋणपत्र व्यक्तिगत तवरबाट बिक्री गरिनेछ। बाँकी ४० प्रतिशत अर्थात् १ अर्ब २० करोड रुपैयाँ बराबरका १२ लाख कित्ता ऋणपत्र सर्वसाधारणका लागि निष्काशन गरिने बैंकले जनाएको छ।

उक्त ऋणपत्रमा लगानी गर्ने लगानीकर्ताले वार्षिक ६ प्रतिशतका दरले ब्याज प्राप्त गर्नेछन्। ऋणपत्रको अवधि २०८९ सालसम्म रहनेछ।

Read More

काठमाडौँ । देशका विभिन्न स्थानमा यस साता वर्षाको क्रम जारी रहने पूर्वानुमान गरिएको छ। मौसमविद्का अनुसार यस अवधिमा हल्कादेखि केही स्थानमा भारी वर्षासमेत हुनसक्ने सम्भावना छ।

त्रिभुवन विश्वविद्यालयको जल तथा मौसम विज्ञान केन्द्रीय विभागका सहप्राध्यापक डा. विनोद पोखरेलका अनुसार आज (असोज २०) केही स्थानमा मेघगर्जन, चट्याङ र असिनासहित छोटो समयका लागि भारी वर्षा हुनसक्नेछ। धेरै स्थानमा भने हल्कादेखि मध्यम वर्षाको सम्भावना रहेको उनले बताएका छन्।

सामाजिक सञ्जालमार्फत मौसमबारे जानकारी दिँदै डा. पोखरेलले आज वायुमण्डल अस्थिर रहने भएकाले केही स्थानमा मेघगर्जन, चट्याङ र असिनासहित भारी वर्षा हुनसक्ने बताएका हुन्। उनका अनुसार वर्षाको यो क्रम करिब हप्ताभरि नै जारी रहने देखिएको छ।

उनले मंगलबार र बुधबार (असोज २०–२१) केही स्थानमा तुलनात्मक रूपमा ठूलो वर्षाको सम्भावना रहेको उल्लेख गरेका छन्। त्यसपछि बिहीबारदेखि शनिबारसम्म सामान्यतया हल्कादेखि मध्यम वर्षा हुने उनको अनुमान छ।

बडादसैँको घटस्थापना (असोज २५) देखि भने मौसम क्रमशः खुल्दै जाने सम्भावना रहेको डा. पोखरेलले बताएका छन्। उनका अनुसार घटस्थापनापछि वर्षाको क्रम कम हुँदै मौसममा सुधार आउने सम्भावना छ।

Read More