काठमाडौं । त्रिभुवन विश्वविद्यालयले अध्ययन बिदा लिएर अध्ययन पूरा गरेपछि सेवामा पुनः उपस्थित नभएका प्राध्यापक तथा कर्मचारीहरूलाई १५ दिनभित्र सम्पर्कमा आउन निर्देशन दिएको छ।
त्रिविको अध्ययन बिदा सुव्यवस्थापन कार्यान्वयन समितिले बुधबार सार्वजनिक सूचना जारी गर्दै अध्ययन बिदा उपभोग गरेपछि तोकिएको नियमानुसार सेवामा नफर्किएका वा सेवा अवधि पूरा नगरी बाहिरिएका शिक्षक–कर्मचारीलाई समितिको कार्यालयमा सम्पर्क गर्न आग्रह गरेको हो।
सूचनामा निर्धारित समयसीमाभित्र सम्पर्कमा नआए विश्वविद्यालयसँग गरिएको कबुलियतनामा तथा प्रचलित नियमअनुसार कानुनी कारबाही प्रक्रिया अघि बढाइने स्पष्ट पारिएको छ।
विश्वविद्यालयका अनुसार अध्ययन बिदा लिएका ५० जना प्राध्यापकबाट हालसम्म करिब ११ करोड ८४ लाख रुपैयाँभन्दा बढी रकम फिर्ता भइसकेको छ। शिक्षा तथा खेलकुद मन्त्रालयको समन्वय र त्रिविको सक्रियतामा यो प्रक्रिया अघि बढाइएको जनाइएको छ।
त्रिविले अध्ययन बिदा दक्ष, अनुसन्धानमुखी तथा अन्तर्राष्ट्रिय स्तरको प्राज्ञिक जनशक्ति विकासका लागि प्रदान गरिने विशेष सुविधा भएको उल्लेख गरेको छ। तर केही प्राध्यापकहरूले अध्ययन पूरा गरेपछि सेवामा नफर्किँदा विश्वविद्यालयलाई आर्थिक, शैक्षिक तथा प्राज्ञिक क्षति पुगेको विश्वविद्यालयको भनाइ छ।
त्रिविले सम्झौताअनुसारको सेवा दायित्व पूरा गर्नुपर्ने व्यवस्था स्मरण गराउँदै बाँकी रकम असुली प्रक्रिया निरन्तर जारी रहने जनाएको छ।
