काठमाडौं । प्रतिनिधि सभाको बुधबारको बैठकमा नेपाल–भारत सीमासम्बन्धी प्रधानमन्त्रीले सदनमा दिएको अभिव्यक्तिको स्पष्टीकरण माग गर्दै सांसदहरूले सरकारको जवाफदेहितामाथि प्रश्न उठाएका छन्।
नेकपा (एमाले) का सांसद कृपाराम रानाले लिपुलेक, कालापानी, लिम्पियाधुरा र सुस्तालगायतका क्षेत्रमा नेपालको सीमा अतिक्रमण भएको उल्लेख गर्दै राष्ट्रिय हितभन्दा माथि कोही नहुने धारणा राखे। उनले काठमाडौंका होल्डिङ सेन्टरमा राखिएका सुकुम्बासीहरूलाई मानवोचित व्यवहार नभएको भन्दै तत्काल सुधार गर्न सरकारको ध्यानाकर्षण गराए।
त्यसैगरी, नेपाली कांग्रेसका सांसद चन्द्रमोहन यादवले प्रधानमन्त्रीले संसद्मा नेपाल–भारत सीमाबारे दिएको अभिव्यक्तिको आलोचना गर्दै त्यसलाई सच्याउनुपर्ने तर्क गरे। उनले सभामुखको भूमिकामाथि प्रश्न उठाउँदै कुनै पनि दलप्रति झुकाव नराखी स्वतन्त्र रूपमा काम गर्नुपर्ने बताए। साथै, उनले राष्ट्रिय स्वतन्त्र पार्टी (रास्वपा)सँगको सम्बन्धबारे टिप्पणी गर्दै प्रश्न उठाए।
उनको अभिव्यक्तिपछि सत्तारूढ दल रास्वपाका सांसद गणेश कार्कीले नियमापत्ति जनाएका थिए। त्यसपछि सभामुख डोलप्रसाद अर्यालले उक्त अभिव्यक्तिप्रति ध्यानाकर्षण भएको जनाए।
बैठकको प्रारम्भमै श्रम संस्कृति पार्टीका सांसद हर्कराज राईले सभामुखसँग समय लिएर काठमाडौंका विभिन्न ‘होल्डिङ सेन्टर’मा रहेका सुकुम्बासीहरूको उचित व्यवस्थापन गर्न माग गरेका थिए। उनले उनीहरूका लागि सुरक्षित र सम्मानजनक बन्दोबस्ती आवश्यक रहेको बताए।
यसैबीच, नेपाली कम्युनिष्ट पार्टीका सांसद गोपाल शर्माले संविधानले सरकारलाई संसद्प्रति उत्तरदायी बनाएको उल्लेख गर्दै प्रधानमन्त्रीले सीमासम्बन्धी विषयमा दिएको अभिव्यक्तिबारे सभामुखले ‘रुलिङ’ गर्नुपर्ने र प्रधानमन्त्री स्वयं संसद्मा आएर स्पष्ट पार्नुपर्ने माग गरे। उनले मन्त्रीहरूका गैरजिम्मेवार अभिव्यक्तिप्रति पनि कडा कारबाही आवश्यक रहेको धारणा राखे।
