काठमाडौं । अमेरिकी अन्तरिक्ष एजेन्सी (नासा) ले सार्वजनिक गरेको प्रारम्भिक उपग्रह विश्लेषणले गत साता भेनेजुएलामा आएका दुई शक्तिशाली भूकम्पबाट ५८ हजारभन्दा बढी भवनमा क्षति पुगेको देखाएको छ।
नासाका अनुसार भूकम्पपछिको अवस्थाको अध्ययन गर्न सङ्कलन गरिएको उपग्रह राडार तथ्याङ्कको विश्लेषणबाट प्रभावित क्षेत्रमा करिब ५८ हजार ८७० भवन क्षतिग्रस्त भएको अनुमान गरिएको हो।
ओरेगन स्टेट युनिभर्सिटीका अनुसन्धानकर्ता कोरी शेर र जामोन भान डेन होकले भूकम्पको भोलिपल्ट अर्थात् जुन २५ मा सङ्कलन गरिएको तथ्याङ्कको अध्ययन गरेका हुन्। उक्त विश्लेषण युरोपेली अन्तरिक्ष एजेन्सीको उच्च–रिजोल्युसन राडार इमेजरी उपग्रह ‘सेन्टिनेल–१’ बाट प्राप्त विवरणमा आधारित रहेको जनाइएको छ।
गत साता भेनेजुएलामा ७.२ र ७.५ म्याग्निच्युडका दुई शक्तिशाली भूकम्प गएको थियो। त्यस घटनामा हालसम्म एक हजार ७०० जनाको मृत्यु भएको पुष्टि भएको छ भने हजारौँ व्यक्ति अझै बेपत्ता रहेको अधिकारीहरूले जनाएका छन्।
अनुसन्धानकर्ताहरूका अनुसार यो द्रुत प्रारम्भिक मूल्याङ्कन भएकाले यसले सम्भावित क्षतिको अवस्था देखाएको मात्र हो। वास्तविक क्षतिको विस्तृत प्रमाणीकरण प्रक्रिया अझै जारी रहेको उनीहरूको भनाइ छ।
नासाले उपग्रहबाट प्राप्त तथ्याङ्कले प्रभावित क्षेत्रमा खटिएका उद्धार टोलीलाई क्षतिको अवस्था छिटो मूल्याङ्कन गर्न तथा उद्धार र राहत कार्यलाई प्रभावकारी रूपमा सञ्चालन गर्न महत्वपूर्ण सहयोग पुग्ने जनाएको छ।
