काठमाडौं । पूर्वाधार विकास मन्त्रालयले आगामी आर्थिक वर्ष २०८३/८४ मा निर्वाचन क्षेत्र रणनीतिक सडकअन्तर्गत अधुरा रहेका योजनाको निर्माण सम्पन्न गर्न रु दुई अर्ब बजेट विनियोजन गरेको छ।
मन्त्रालयले हाल सार्वजनिक गरेको वार्षिक विकास कार्यक्रमअनुसार ३९ जिल्लाका अधुरा निर्वाचन क्षेत्र रणनीतिक सडक योजनाका लागि आवश्यकताका आधारमा बजेट छुट्टाइएको हो।
कार्यक्रमअनुसार कञ्चनपुरका अधुरा रणनीतिक सडक योजनाका लागि रु १४ करोड ५० लाख, अछामका योजनाका लागि रु १० करोड, मकवानपुरका लागि रु ११ करोड ५० लाख र मोरङका लागि रु १३ करोड ५० लाख बजेट विनियोजन गरिएको छ।
मन्त्रालयले अधुरा रणनीतिक सडक योजना सम्पन्न गर्न न्यूनतम रु ३० लाखदेखि अधिकतम रु १४ करोड ५० लाखसम्म बजेट विनियोजन गरेको जनाएको छ।
