काठमाडौं । संघीय संसद्अन्तर्गत राष्ट्रियसभाको आज अपराह्न १ः१५ बजे बस्ने बैठकमा आर्थिक तथा बजेटसम्बन्धी विधेयक र विनियोजन विधेयकमाथिको छलफललाई प्राथमिकतामा राखिएको छ।
संसद् सचिवालयका अनुसार बैठकमा राष्ट्रियसभाका सचिव तुलबहादुर कँडेलले “आर्थिक विधेयक, २०८३” र “राष्ट्र ऋण उठाउने विधेयक, २०८३” सम्बन्धमा प्रतिनिधिसभाबाट प्राप्त सन्देश सभासमक्ष टेबल गर्ने कार्यसूची रहेको छ।
त्यसपछि विनियोजन विधेयक, २०८३ अन्तर्गत विभिन्न मन्त्रालयहरूको बजेट शीर्षकमाथि समूहीकृत छलफल हुनेछ। छलफल हुने मन्त्रालयहरूमा उद्योग, वाणिज्य तथा आपूर्ति; कृषि, वन तथा वातावरण; पूर्वाधार विकास; गृह; ऊर्जा, जलस्रोत तथा सिँचाइ; परराष्ट्र; अर्थ तथा रक्षा मन्त्रालय रहेका छन्।
त्यसैगरी राष्ट्रपतिको कार्यालय, उपराष्ट्रपतिको कार्यालय, प्रधानमन्त्री तथा मन्त्रिपरिषद्को कार्यालय तथा राष्ट्रिय योजना आयोगको सचिवालयको विनियोजन शीर्षकमाथि पनि बैठकमा छलफल हुने कार्यसूची रहेको संसद् सचिवालयले जनाएको छ।
संसद् बैठकमा बजेट कार्यान्वयन, खर्च व्यवस्थापन र मन्त्रालयगत विनियोजनका विषयमा सांसदहरूले धारणा राख्ने अपेक्षा गरिएको छ।
