काठमाडौं । राष्ट्रिय स्वतन्त्र पार्टी (रास्वपा) ले सांसदहरूको गतिविधि, भेटघाट तथा निर्वाचन क्षेत्रका नागरिकका गुनासो व्यवस्थापनलाई प्रभावकारी बनाउन ‘पल्स आरएसपी’ नामक डिजिटल प्लेटफर्म विकास गरेको छ। पार्टीलाई पूर्ण रूपमा डिजिटल प्रणालीतर्फ उन्मुख बनाउने लक्ष्यसहित उक्त प्रणाली निर्माण गरिएको रास्वपाले जनाएको छ।
पार्टीका अनुसार सांसदहरूको कामकाज पारदर्शी र व्यवस्थित बनाउन यो प्रणाली उपयोगी हुने अपेक्षा गरिएको छ। साथै, साइबर सुरक्षासम्बन्धी सचेतना अभिवृद्धि गर्ने उद्देश्यले शुक्रबार बिहान सिंहदरबारस्थित पार्टी कार्यालयमा प्रतिनिधिसभा सदस्यहरूलाई अभिमुखीकरण कार्यक्रमसमेत आयोजना गरिएको मुख्य सचेतक कविन्द्र बुर्लाकोटीले जानकारी दिए।
नयाँ प्रणाली लागू भएपछि सांसदहरूले संसद् बैठकपछि आफ्ना सबै गतिविधि अनिवार्य रूपमा डिजिटल प्रणालीमा अद्यावधिक गर्नुपर्नेछ। सांसदबीच भेटघाटका लागि समय माग गर्ने, संसद्मा उठाउने विषयवस्तु प्रविष्ट गर्ने तथा निर्वाचन क्षेत्रमा हुने भ्रमण, भेटघाट र कार्यक्रमहरूको विवरण समेत सोही प्रणालीमा राख्नुपर्ने व्यवस्था गरिएको छ।
रास्वपाले यो प्रणालीले सांसदहरूको कामकाजलाई व्यवस्थित बनाउने, पारदर्शिता बढाउने तथा नागरिक र जनप्रतिनिधिबीचको सम्बन्धलाई अझ प्रभावकारी बनाउने विश्वास व्यक्त गरेको छ।
