काठमाडौं । प्रधानमन्त्री वालेन्द्र शाह (बालेन) र अर्थमन्त्री डा. स्वर्णिम वाग्लेबिच पछिल्लो समय दूरी बढ्दै गएको चर्चा राजनीतिक वृत्तमा हुन थालेको छ । विशेषगरी अर्थमन्त्री वाग्लेले ल्याएको बजेट, कर नीति र आर्थिक निर्णय प्रक्रियालाई लिएर प्रधानमन्त्री पक्ष असन्तुष्ट रहेको स्रोतहरूको दाबी छ ।
प्रधानमन्त्री निकट स्रोतका अनुसार बजेटमा समावेश गरिएका केही कर व्यवस्थाप्रति प्रधानमन्त्री शाहको आपत्ति रहेको छ । विशेषगरी शिक्षा, स्वास्थ्य र विद्युत् क्षेत्रमा लगाइएको करप्रति प्रधानमन्त्री असहमत रहेको बताइएको छ ।
स्रोतले भन्यो, “शिक्षा, स्वास्थ्य र बिजुलीमा कर लगाउने विषयमा प्रधानमन्त्रीको टिमसँग पूर्व छलफल भएको थिएन । सम्बन्धित मन्त्रालयसँग पनि समन्वय भएन । त्यसैले प्रधानमन्त्रीले यस विषयमा असन्तुष्टि जनाउँदै आउनुभएको छ र पार्टी नेतृत्वलाई समेत जानकारी गराइसक्नुभएको छ ।”
अर्थ मन्त्रालयको विषयमा प्रधानमन्त्रीको सक्रियता बढ्यो
प्रधानमन्त्री शाह अर्थ मन्त्रालयको कामकारबाहीप्रति असन्तुष्ट रहेको संकेत पछिल्लो समयका गतिविधिबाट देखिएको स्रोतको दाबी छ । प्रधानमन्त्रीले अर्थ मन्त्रालयसँग सम्बन्धित विषयमा आफैं सक्रियता बढाउँदै अर्थमन्त्री वाग्लेलाई कतिपय छलफलबाट टाढा राखेको बताइएको छ ।
आर्थिक क्षेत्रसँग सम्बन्धित विभिन्न संस्थासँग प्रधानमन्त्रीले आफैं उच्चस्तरीय भेटवार्ता गरेका छन् । नेपाल उद्योग वाणिज्य महासंघ, नेपाल उद्योग परिसंघ, नेपाल राष्ट्र बैंकका गभर्नर, निर्माण व्यवसायी महासंघ तथा होटल व्यवसायीका प्रतिनिधिसँग भएका छलफलमा अर्थमन्त्री वाग्लेको सहभागिता नरहेको बताइएको छ ।
त्यस्तै, पुँजी बजार, धितोपत्र व्यवसाय र बीमा क्षेत्रका प्रतिनिधिसँग प्रधानमन्त्रीले गर्ने भनिएको छलफलमा पनि अर्थमन्त्री सहभागी हुने वा नहुने विषय स्पष्ट छैन ।
स्रोतका अनुसार प्रधानमन्त्रीले यस्ता बैठकमा अर्थमन्त्रीको स्थानमा रास्वपाकी सांसद तथा उद्यमी विदुषी राणालाई सहभागी गराउँदै आएका छन् । आफूलाई निर्णय प्रक्रियाबाट अलग राखिएको महसुस भएपछि अर्थमन्त्री वाग्ले प्रधानमन्त्रीसँग असन्तुष्ट बनेको दाबी गरिएको छ ।
लामिछाने र वाग्लेको २४ घण्टे छलफलले बढायो राजनीतिक चासो
यसैबीच, रास्वपाका सभापति रवि लामिछाने र उपसभापतिसमेत रहेका अर्थमन्त्री वाग्लेबिच करिब २४ घण्टा लामो छलफल भएको छ ।
काभ्रेपलाञ्चोकस्थित दुसित थानी रिसोर्टमा भएको उक्त भेटमा सरकारको कामकारबाही, प्रधानमन्त्री शाहको कार्यशैली, सरकारका पछिल्ला गतिविधि तथा सुकुम्बासी व्यवस्थापनलगायत विषयमा समीक्षा भएको स्रोतको भनाइ छ ।
शनिबार दिउँसो पत्नी सहित रिसोर्ट पुगेका सभापति लामिछाने र त्यसभन्दा अगाडि नै पुगेका अर्थमन्त्री वाग्लेबिच भएको छलफलपछि लामिछाने आइतबार साँझ काठमाडौं फर्किएका थिए ।
स्रोतका अनुसार बैठकमा सरकारप्रति बढ्दै गएको जनअसन्तुष्टि, पार्टीको नीति तथा घोषणापत्रअनुसार सरकार सञ्चालन भइरहेको छ कि छैन भन्ने विषयमा पनि गम्भीर समीक्षा भएको थियो । सरकारको काम गर्ने शैलीमा सुधार आवश्यक रहेको र अवस्था नसुध्रिए नेतृत्व तहमा परिवर्तनको विकल्पसमेत छलफलमा आएको दाबी गरिएको छ ।
वाग्लेलाई हटाउने प्रस्तावबारे चर्चा
यसअघि प्रधानमन्त्री शाहले लामिछाने निवासमै पुगेर अर्थमन्त्री वाग्लेको कार्यशैलीप्रति असन्तुष्टि जनाउँदै उनलाई हटाउनुपर्ने प्रस्ताव राखेको चर्चा राजनीतिक क्षेत्रमा चलेको थियो ।
तर, सभापति लामिछानेले उक्त प्रस्ताव स्वीकार नगरेको स्रोतको दाबी छ । प्रधानमन्त्रीले अर्थमन्त्रीको जिम्मेवारीमा वाग्लेको स्थानमा विदुषी राणालाई ल्याउन चाहेको चर्चा पनि भइरहेको छ ।
यद्यपि, लामिछाने निकट एक नेताले सार्वजनिक भएका सबै समाचार सत्य नभएको दाबी गरेका छन् । उनका अनुसार प्रधानमन्त्री र अर्थमन्त्रीबीच केही विषयमा मतभिन्नता भए पनि वाग्लेलाई हटाउने औपचारिक प्रस्ताव पार्टीमा आएको छैन ।
ती नेताले भने, “प्रधानमन्त्री र अर्थमन्त्रीबीच देखिएको असहमतिलाई समाधान गर्ने उद्देश्यले नै सभापति र उपसभापतिबिच छलफल भएको हो । पार्टी नेतृत्वले समस्या समाधान गर्ने विश्वास छ ।”
आगामी दिन निर्णायक हुने संकेत
सभापति लामिछाने र अर्थमन्त्री वाग्लेबिच भएको छलफलको विस्तृत विवरण औपचारिक रूपमा सार्वजनिक गरिएको छैन । तर, पछिल्लो समय रास्वपाकै केही सांसदहरूले संसद् र सामाजिक सञ्जालमार्फत सरकारको कार्यशैलीमाथि प्रश्न उठाउँदै आएका छन् ।
प्रधानमन्त्रीले अर्थ मन्त्रालयसँग सम्बन्धित निकायसँग गर्ने भेटवार्तामा अर्थमन्त्रीको अनुपस्थिति र त्यसैबीच भएको लामो छलफलले सरकारभित्र देखिएको असमझदारीलाई थप चर्चाको विषय बनाएको छ ।
अब प्रधानमन्त्री, अर्थमन्त्री र पार्टी नेतृत्वबीचको समन्वयले आगामी राजनीतिक दिशा निर्धारण गर्ने देखिन्छ ।
