काठमाडौं । सङ्घीय संसद्अन्तर्गतको संसदीय सुनुवाइ समितिको बैठक आज बिहान ११ बजे सिंहदरबारस्थित संसद् भवनमा बस्ने भएको छ। बैठक राज्य व्यवस्था तथा सुशासन समितिको सभाकक्षमा आयोजना हुने संसद् सचिवालयले जनाएको छ।
आजको बैठकमा प्रमुख निर्वाचन आयुक्त तथा निर्वाचन आयुक्त पदमा नियुक्तिका लागि सिफारिस गरिएका व्यक्तिहरूमाथि प्राप्त उजुरीबारे छलफल हुने कार्यसूची रहेको छ। साथै प्रस्तावित पदाधिकारीहरूले पेस गरेका कार्ययोजनासमेत समितिका सदस्यहरूलाई वितरण गरिने सम्भावित कार्यसूची रहेको संसद् सचिवालयले जनाएको छ।
गत असार १९ गते बसेको संवैधानिक परिषद्को बैठकले प्रमुख निर्वाचन आयुक्त पदमा मानबहादुर कार्कीलाई सिफारिस गर्ने निर्णय गरेको थियो। त्यस्तै निर्वाचन आयुक्त पदका लागि डा. राजीव सुब्बा र गुरुप्रसाद वाग्लेको नाम पनि सिफारिस गरिएको थियो।
संवैधानिक व्यवस्थाअनुसार संसदीय सुनुवाइ समितिबाट सिफारिस भएका नाम अनुमोदन भएपछि राष्ट्रपतिले प्रमुख निर्वाचन आयुक्त तथा निर्वाचन आयुक्तहरूको नियुक्ति गर्ने प्रावधान रहेको छ। समितिको सुनुवाइ प्रक्रिया संवैधानिक पदाधिकारीको नियुक्तिको महत्त्वपूर्ण चरण मानिन्छ।
