काठमाडौं । सभामुख डोलप्रसाद अर्याल र प्रमुख प्रतिपक्षी दल नेपाली कांग्रेसका संसदीय दलका नेता भीष्मराज आङ्देम्बेबीच सिंहदरबारमा भेटवार्ता भएको छ। मुलुकमा देखिएका पछिल्ला राजनीतिक तथा सामाजिक घटनाक्रमका विषयमा केन्द्रित रहेर भएको भेटमा संसद्को आगामी भूमिका, शान्ति–सुरक्षा अवस्था र जनतासँग प्रत्यक्ष जोडिएका विषयमा छलफल भएको हो।
भेटका क्रममा नेता आङ्देम्बेले सुनसरीको देवानगञ्जमा भएको हिंसात्मक घटनाप्रति सभामुखको ध्यानाकर्षण गराएका थिए। उनले पछिल्ला घटनाक्रमले शान्ति–सुरक्षाको अवस्थाप्रति चिन्ता बढाएको उल्लेख गर्दै नागरिकको सुरक्षाका लागि सरकारले प्रभावकारी कदम चाल्नुपर्ने आवश्यकता औँल्याए।
उनले संसद्ले सरकारलाई जनताको सुरक्षासँग सम्बन्धित विषयमा जिम्मेवार बनाउन र आवश्यक निर्देशन दिन प्रभावकारी भूमिका निर्वाह गर्नुपर्ने धारणा राखेका थिए।
बैठकमा पछिल्लो समय विभिन्न जिल्लामा आएको बाढी तथा पहिरोबाट प्रभावित नागरिकको अवस्थाबारे पनि छलफल भएको थियो। विशेषगरी पाँचथरसहितका क्षेत्रमा प्राकृतिक विपद्बाट प्रभावित नागरिकको उद्धार, राहत वितरण र पुनर्स्थापनालाई तीव्र बनाउनुपर्ने विषयमा जोड दिइएको थियो।
यसैगरी नारायणी अस्पतालका चिकित्सकमाथि भएको दुर्व्यवहार र त्यसपछि स्वास्थ्यकर्मीहरूले थालेको आन्दोलनबारे पनि नेता आङ्देम्बेले सभामुखको ध्यानाकर्षण गराएका थिए।
भेटमा संसद्ले जनसरोकारका विषयलाई प्रभावकारी रूपमा उठाउने र सरकारलाई जवाफदेही बनाउने भूमिकाबारे समेत छलफल भएको जनाइएको छ।
