काठमाडौं । नेपाली कम्युनिष्ट पार्टी (नेकपा)का संयोजक पुष्पकमल दाहाल ‘प्रचण्ड’ले नेपालको राजनीति अझै सहज अवस्थामा नआएको बताएका छन्।
बिहीबार प्रतिनिधिसभाको बैठकमा बोल्दै पूर्वप्रधानमन्त्रीसमेत रहेका प्रचण्डले राष्ट्रिय स्वतन्त्र पार्टी (रास्वपा) नेतृत्वको दुई तिहाइ नजिकको सरकार बने पनि राजनीतिक अवस्था अपेक्षाअनुसार अघि बढ्न नसकेको टिप्पणी गरे।
उनले नयाँ र पुरानो राजनीतिक शक्तिको बहस भइरहे पनि नयाँ पार्टी नेतृत्वको सरकारले जनताको अपेक्षाअनुसार काम गर्न नसकेको बताए। सरकारप्रति नागरिकको ठूलो आशा रहे पनि पछिल्ला गतिविधिले निराशा बढाएको उनको भनाइ थियो।
प्रचण्डले सरकारका विभिन्न निर्णय र कामकारबाही, सुकुम्बासी समस्या, ट्रेड युनियन अधिकार, विद्यार्थीका विषय, सीमा र राष्ट्रिय स्वाधीनतासँग सम्बन्धित विषयमा जनतामा चिन्ता बढेको दाबी गरे।
उनले सरकारबाट राम्रो कामको अपेक्षा गरिए पनि कतिपय अवस्थामा पुराना भनिएका शक्तिभन्दा पनि कमजोर देखिने अवस्था आएको टिप्पणी गरे।
