काठमाडौं। वीरगन्जका अस्पतालहरूमा चार दिनदेखि अवरुद्ध रहेको बिरामी उपचार सेवा पुनः सञ्चालनमा आएको छ। नारायणी अस्पतालमा आकस्मिक सेवा बुधबार राति ९ बजेदेखि र ओपीडी सेवा बिहीबार बिहानदेखि सुचारु भएको अस्पतालका प्रवक्ता डा. उदयनारायण सिंहले जानकारी दिए।
गत शनिबार नारायणी अस्पतालमा भएको तोडफोड तथा चिकित्सकमाथि भएको कुटपिटको विरोधमा नारायणी अस्पतालसहित वीरगन्जका अस्पतालका चिकित्सकहरूले आइतबारदेखि आकस्मिक सेवासहित सबै उपचार सेवा बन्द गर्दै आन्दोलन थालेका थिए।
बुधबार काठमाडौंमा नेपाल चिकित्सक संघ र स्वास्थ्य मन्त्रालयबीच पाँचबुँदे सहमति भएपछि उपचार सेवा पुनः सञ्चालन गर्ने वातावरण बनेको हो। साथै, नारायणी अस्पतालमा भएको घटनामा संलग्न व्यक्तिहरूविरुद्ध नेपाल चिकित्सक संघ नारायणी शाखा र अस्पताल प्रशासनले दिएको किटानी जाहेरी प्रहरीले दर्ता गरेपछि चिकित्सकहरूले आन्दोलन स्थगित गर्दै काममा फर्किएका हुन्।
डा. सिंहका अनुसार घटनाको निष्पक्ष अनुसन्धान गरी दोषीमाथि कानुनी कारबाही गर्ने प्रतिबद्धता प्रहरी प्रशासनबाट आएपछि अस्पतालका सेवा पुनः सञ्चालन गर्ने निर्णय गरिएको हो।
नारायणी अस्पतालमा भएको तोडफोड तथा चिकित्सकमाथि कुटपिटको घटनामा संलग्न रहेको आरोपमा प्रहरीले वीरगन्ज–२५ का वडाध्यक्ष आशुतोष चतुर्वेदीसहित तीन जनालाई नियन्त्रणमा लिएर अनुसन्धान गरिरहेको छ।
यसैबीच, आन्दोलनरत चिकित्सकहरूसँग जिल्ला प्रशासन कार्यालयमा वार्ता भइरहेका बेला चिकित्सकमाथि दुर्व्यवहार गरेको आरोप लागेका पर्साका तत्कालीन प्रहरी उपरीक्षक सुदीपराज पाठकलाई प्रहरी प्रधान कार्यालयले हेडक्वार्टर तानेको छ। उनको स्थानमा प्रहरी उपरीक्षक पवन भट्टराईलाई बुधबार साँझ नै पर्सामा खटाइएको छ।
गत शनिबार नारायणी अस्पतालमा उपचारका क्रममा वीरगन्ज–२५ का राजकुमार पटेलको मृत्यु भएपछि आक्रोशित समूहले अस्पतालमा तोडफोड गर्नुका साथै मेडिकल अफिसर डा. प्रमोद राममाथि कुटपिट गरेको थियो। त्यसको विरोधमा वीरगन्जका चिकित्सकहरूले आइतबारदेखि र देशभरका चिकित्सकहरूले मंगलबारदेखि उपचार सेवा ठप्प पार्दै आन्दोलन गरेका थिए।
