काठमाडौं । आकर्षक तलबसहित वैदेशिक रोजगारीमा पठाइदिने प्रलोभन देखाएर विभिन्न व्यक्तिबाट लाखौं रुपैयाँ ठगी गरेको आरोपमा तीन जना पक्राउ परेका छन्।
पक्राउ पर्नेमा दाङ घर भई काठमाडौंको टोखा नगरपालिका–१० बस्ने ३२ वर्षीय पवन कुमार केसी (विक्रम), रौतहट घर भई काठमाडौं महानगरपालिका–३ बस्ने २१ वर्षीय सुधिर प्रसाद जयसवाल तथा काभ्रे घर भई काठमाडौं महानगरपालिका–२५ बस्ने ३८ वर्षीया लक्ष्मी खड्का रहेका छन्।
प्रहरीका अनुसार पवनले दुई जना पीडितलाई सिंगापुर पठाइदिने भन्दै ७ लाख रुपैयाँ ठगी गरेका थिए। त्यसैगरी, सुधिरले साइप्रस पठाइदिने भन्दै एक जनाबाट १ लाख रुपैयाँ र लक्ष्मीले रोमानिया पठाइदिने भन्दै १ लाख ५० हजार रुपैयाँ लिएपछि सम्पर्कविहीन भएको आरोप छ।
पीडितहरूको उजुरीका आधारमा काठमाडौं उपत्यका अपराध अनुसन्धान कार्यालय, टेकुबाट खटिएको प्रहरी टोलीले पवनलाई काठमाडौं महानगरपालिका–१०, सुधिरलाई टोखा नगरपालिका–९ र लक्ष्मीलाई काठमाडौं महानगरपालिका–१२ बाट पक्राउ गरेको हो।
प्रहरीले उनीहरूलाई आवश्यक अनुसन्धान तथा कानुनी कारबाहीका लागि वैदेशिक रोजगार विभाग पठाएको जनाएको छ।
