काठमाडौं । पूर्वी नाका काँकडभिट्टा हुँदै भारततर्फ हुने नेपाली चियाको निर्यातमा गिरावट आएको छ। अघिल्लो आर्थिक वर्षको तुलनामा आर्थिक वर्ष २०८२/०८३ मा चिया निर्यातको परिमाण र त्यसबाट हुने आम्दानी दुवै घटेको काँकडभिट्टा भन्सार कार्यालयको तथ्याङ्कले देखाएको छ।
भन्सार कार्यालयका अनुसार आव २०८२/०८३ मा ३ अर्ब ५२ करोड ९६ लाख ६९ हजार रुपैयाँ बराबरको १३ हजार ४५ मेट्रिक टन चिया निर्यात भएको छ। जबकि आव २०८१/०८२ मा ४ अर्ब १६ करोड ९३ लाख ५८ हजार रुपैयाँ बराबरको १५ हजार ३११ मेट्रिक टन चिया निर्यात भएको थियो।
निर्यात परिमाण घटेसँगै आम्दानीमा ६३ करोड ९६ लाख ८९ हजार रुपैयाँले कमी आएको छ। काँकडभिट्टा भन्सार कार्यालयका प्रमुख भन्सार प्रशासक शिवलाल न्यौपानेका अनुसार यस नाकाबाट निर्यात हुने प्रमुख वस्तुमध्ये अलैँचीपछि चिया दोस्रो स्थानमा रहेको छ।
उनका अनुसार नेपाली चियाको मुख्य बजार भारत भएकाले भारतीय बजारमा हुने मूल्य उतारचढाव, गुणस्तर परीक्षणका क्रममा देखिने गैर–भन्सार अवरोध तथा अन्तर्राष्ट्रिय बजारको मागअनुसार उत्पादन र मूल्य निर्धारणमा हुने परिवर्तनका कारण निर्यात प्रभावित भएको हो।
नेपालमा उत्पादित सिटिसी र अर्थोडक्स चियाको ठूलो हिस्सा काँकडभिट्टा नाका हुँदै भारतीय बजारमा पुग्ने गरेको छ। चिया निर्यातमा आएको गिरावटले किसान, चिया उद्योगी तथा समग्र वैदेशिक व्यापारमा समेत प्रभाव पार्न सक्ने देखिएको छ।
