काठमाडौं । केही दिनदेखि लगातार भइरहेको अविरल वर्षाका कारण देशका विभिन्न मुख्य राजमार्गमा बाढी र पहिरो जाँदा यातायात सेवा प्रभावित भएको छ। नेपाल प्रहरीले दिएको जानकारीअनुसार उपत्यका, कोशी र बागमती प्रदेशका विभिन्न स्थानमा सडक पूर्ण तथा आंशिक रूपमा अवरुद्ध भएका छन्।
काठमाण्डु र ललितपुर जोड्ने तथा बाहिरी जिल्लातर्फ जाने वैकल्पिक सडकहरू पनि पहिरोका कारण प्रभावित भएका छन्। ललितपुरको बागमती गाउँपालिका–३, पाण्डुरमा पहिरो खसेपछि कान्तिलोकपथ पूर्ण रूपमा अवरुद्ध भएको छ। त्यस्तै, काठमाण्डुको नागार्जुन नगरपालिका–८, ठुलो खोलामा पहिरो जाँदा सितापाइला–धार्के सडक खण्ड पनि पूर्ण रूपमा बन्द भएको छ।
कोशी प्रदेशअन्तर्गत भोजपुर र इलाममा समेत सडक अवरोध देखिएको छ। भोजपुर नगरपालिका–५, बोखिममा बाढीका कारण मध्यपहाडी लोकमार्ग एकतर्फी रूपमा मात्र सञ्चालनमा रहेको छ। त्यहाँ वैकल्पिक बाटोको व्यवस्था गरिएको प्रहरीले जनाएको छ। यता, इलाम नगरपालिका–९, राजदुवालीमा अविरल वर्षाका कारण मेची राजमार्ग पूर्ण रूपमा अवरुद्ध भएको छ। उक्त क्षेत्रमा पनि वैकल्पिक मार्ग प्रयोग गर्न सकिने जनाइएको छ।
बागमती प्रदेशमा विपद्को जोखिमलाई ध्यानमा राख्दै केही राजमार्गमा समय तोकेर सवारी सञ्चालनमा रोक लगाइएको छ। बीपी राजमार्गको खुर्कोट–नेपालथोक–कटुन्जेबेँसी खण्डमा सम्भावित बाढीको जोखिमका कारण बेलुका ६ बजेदेखि बिहान ४ बजेसम्म सबै प्रकारका सवारी सञ्चालनमा रोक लगाइएको छ। बिहान ४ बजेदेखि साँझ ६ बजेसम्म भने सडकको अवस्था हेरेर यातायात सञ्चालन गरिनेछ।
कान्तिलोकपथको हेटौँडा–ठिङ्गन–ललितपुर खण्डमा पनि बाढी तथा पहिरोको जोखिमका कारण रातिको समयमा सवारी आवागमन रोकिएको छ। उक्त खण्डमा साँझ ५ बजेदेखि बिहान ५ बजेसम्म सवारी सञ्चालन गर्न नदिइने जनाइएको छ।
यसैगरी, अरनिको राजमार्गअन्तर्गत सिन्धुपाल्चोकको भोटेकोशी गाउँपालिका–४, चारकिलो र वडा नम्बर २, कोदारी क्षेत्रमा पहिरो खसेपछि सडक पूर्ण रूपमा अवरुद्ध भएको छ।
प्रहरीले सडकको पछिल्लो अवस्था बुझेर मात्र यात्रा गर्न र यात्राका क्रममा उच्च सतर्कता अपनाउन सर्वसाधारणलाई आग्रह गरेको छ।
