काठमाडौँ । संघीय संसद्अन्तर्गतका पाँच वटा संसदीय समितिको बैठक आज मंगलबार बस्दैछ। समितिहरूले विभिन्न विधेयक, कानुनी संशोधन तथा जनसरोकारसँग जोडिएका विषयमा छलफल गर्ने कार्यसूची तय गरेका छन्।
अर्थ समितिको बैठकमा ‘नेपाल राष्ट्र बैंक ऐन, २०५८ लाई संशोधन गर्न बनेको विधेयक’ माथिको छलफललाई अघि बढाइने भएको छ। बैंकिङ क्षेत्रको नियमन, राष्ट्र बैंकको अधिकार क्षेत्र र वित्तीय प्रणालीसँग सम्बन्धित विषय समेटिएको उक्त विधेयकमाथि समितिले दफावार छलफल गर्नेछ।
यसैगरी, उद्योग तथा वाणिज्य र श्रम तथा उपभोक्ता हित समितिले खाना पकाउने ग्यासको आपूर्ति व्यवस्थापनबारे सम्बन्धित निकायका पदाधिकारीसँग छलफल गर्नेछ। ग्यास आपूर्ति, वितरण प्रणाली र उपभोक्ताका समस्याका विषयमा बैठक केन्द्रित हुने जनाइएको छ।
राज्य व्यवस्था तथा सुशासन समितिमा ‘नेपाल विशेष सेवा ऐन, २०४२ को साबिक व्यवस्था जगाउनेसम्बन्धी विधेयक, २०८३’ माथि सैद्धान्तिक तथा दफावार छलफल हुने भएको छ। समितिले कार्यविधि मस्यौदा तर्जुमा उपसमितिको प्रतिवेदनमाथि समेत छलफल गर्नेछ।
अन्तर्राष्ट्रिय सम्बन्ध तथा पर्यटन समितिले ‘पर्यटन विधेयक, २०८१’ माथि मन्त्रालयका अधिकारीहरूसँग छलफल गर्ने कार्यसूची राखेको छ। पर्यटन क्षेत्रको कानुनी सुधारसँग सम्बन्धित विषयमा बैठकमा विचारविमर्श हुनेछ।
त्यस्तै, सार्वजनिक नीति तथा प्रत्यायोजित विधायन समितिले पूर्वसभापति रामनारायण विडारीलाई आमन्त्रण गरी सरकारी आश्वासन कार्यान्वयनको अवस्था र आगामी रणनीतिबारे छलफल गर्ने कार्यक्रम तय गरेको छ।
संसदीय समितिका यी बैठकहरूमा कानुन निर्माण, नीति सुधार र सार्वजनिक सरोकारका विषयमा सांसदहरूले सम्बन्धित निकायका प्रतिनिधिसँग छलफल गर्नेछन्।
