काठमाडौँ । प्रधानमन्त्री तथा रक्षा मन्त्रीसमेत रहेका वालेन्द्र (बालेन) शाह र प्रधान सेनापति अशोकराज सिग्देलबीच मंगलबार बिहान सिंहदरबारस्थित प्रधानमन्त्री तथा मन्त्रिपरिषद्को कार्यालयमा भेटवार्ता भएको छ।
नेपाली सेनाका प्रवक्ता राजाराम बस्नेतका अनुसार प्रधानमन्त्री र प्रधान सेनापतिबीच नियमित रूपमा हुने भेटघाटअन्तर्गत यसपटक समसामयिक विषयमा छलफल भएको हो।
बस्नेतले भने, “पछिल्लो समयका समसामयिक विषयमा उहाँहरूबीच छलफल भएको हो।”
स्रोतका अनुसार भेटमा मोरङ र मधेशमा उत्पन्न विवाद तथा मुलुकको समग्र सुरक्षा अवस्थाबारे विचार–विमर्श भएको छ। साथै पछिल्ला सुरक्षा चुनौती, शान्ति–सुव्यवस्था कायम गर्ने उपाय र सुरक्षा निकायबीचको समन्वयका विषयमा पनि छलफल भएको जनाइएको छ।
यसैबीच, गोकर्णेश्वरमा राष्ट्रिय स्वतन्त्र पार्टी (रास्वपा)का सांसद राजुनाथ पाण्डे र नेपाली सेनाका एक अधिकृतबीच ब्यारेकको पर्खालसम्बन्धी विषयलाई लिएर भएको भनाभनको भिडियो सामाजिक सञ्जालमा चर्चामा रहेका बेला प्रधानमन्त्री र प्रधान सेनापतिबीच भएको यो भेटलाई अर्थपूर्ण रूपमा हेरिएको छ।
