काठमाडौं। धादिङको गजुरी गाउँपालिका–२, चालिसेमा सुक्खा पहिरो खसेर अवरुद्ध भएको पृथ्वीराजमार्ग करिब चार घण्टापछि दुईतर्फी रूपमा सञ्चालनमा आएको छ।
सोमबार बिहान पौने ६ बजे पहिरो खसेपछि काठमाडौं भित्रिने र बाहिरिने दुवैतर्फको यातायात रोकिएको थियो। सडक अवरुद्ध हुँदा राजमार्गमा सवारीसाधनको लामो जाम लागेको थियो।
जिल्ला ट्राफिक प्रहरी कार्यालय धादिङ र इलाका प्रहरी कार्यालय गजुरीबाट खटिएको प्रहरी टोलीले निर्माणाधीन सडक आयोजनाको डोजर प्रयोग गरी पहिरो हटाएको थियो।
पहिरो पन्छाएपछि राजमार्गमा दुवैतर्फी यातायात सञ्चालनमा आएको प्रहरीले जनाएको छ। सडक खुलेसँगै रोकिएका सवारीसाधन क्रमशः आ–आफ्नो गन्तव्यतर्फ लागेका छन्।
