काठमाडौं । महालेखा नियन्त्रक कार्यालयले संघीय सरकारअन्तर्गत कार्यरत राष्ट्रसेवक कर्मचारीलाई प्रत्येक १५ दिनपछि अर्धमासिक रूपमा तलबभत्ता भुक्तानी गर्न सम्बन्धित निकायलाई निर्देशन दिएको छ।
कार्यालयले सोमबार कोष तथा लेखा नियन्त्रक कार्यालय, सबै निवृत्तभरण व्यवस्थापन कार्यालय तथा कुमारीचोक तथा केन्द्रीय तहसिल कार्यालयलाई पत्राचार गर्दै यस्तो व्यवस्था कार्यान्वयन गर्न अनुरोध गरेको हो।
अर्थमन्त्रीस्तरको २०८३ वैशाख ४ गतेको नीतिगत मार्गदर्शनअनुसार कर्मचारीले १५ दिन काम गरेपछि तलबभत्ता उपलब्ध गराउन भनिएको छ।
यस्तै, बजेट वक्तव्य २०८३/८४ अनुसार कर्मचारी प्रोत्साहन भत्तासमेत भुक्तानी गर्न तथा संघीय सरकारी निकायबाट भुक्तानीका लागि निकासा माग भएमा सोहीअनुसार रकम उपलब्ध गराउन महालेखा नियन्त्रक कार्यालयले निर्देशन दिएको छ।
