काठमाडौँ । राष्ट्रिय स्वतन्त्र पार्टी (रास्वपा)का सांसद खगेन्द्र सुनारले समाज कल्याण परिषद् प्रभावकारी अनुगमन र नियमन गर्न नसक्दा बदनाम बन्दै गएको आरोप लगाएका छन्।
बिहीबार सार्वजनिक लेखा समितिको बैठकमा बोल्दै सांसद सुनारले नेपाललाई प्राप्त हुने वैदेशिक सहायता तथा त्यसको उपयोगबारे प्रभावकारी लेखापरीक्षण र अनुगमन आवश्यक रहेको बताए।
उनले समाज कल्याण परिषद्मा दर्ता भएका गैरसरकारी संस्था (एनजीओ) तथा अन्तर्राष्ट्रिय गैरसरकारी संस्था (आईएनजीओ)ले प्राप्त गर्ने वैदेशिक सहायता, सञ्चालन गर्ने कार्यक्रम तथा त्यसबाट लक्षित समुदायले प्राप्त गरेको लाभको प्रभावकारी मूल्याङ्कन हुनुपर्नेमा त्यसो हुन नसकेको दाबी गरे।
विशेषगरी दलित, गरिब, सीमान्तकृत तथा पिछडिएका समुदायका नाममा प्राप्त हुने वैदेशिक सहायता वास्तविक लक्षित समुदायसम्म पुग्न नसकेको उनको आरोप छ। कार्यक्रम सञ्चालन, तालिम तथा प्रशासनिक खर्चका नाममा ठूलो रकम खर्च हुने गरे पनि त्यसको प्रत्यक्ष प्रभाव र परिणाम देखिन नसकेको उनले बताए।
सांसद सुनारले जात, धर्म वा समुदायका नाममा सामाजिक विभाजन बढाउने गतिविधि वैदेशिक सहायता वा सरकारी स्वीकृतिको आडमा सञ्चालन गर्न नहुने धारणा राखे।
उनले दलित तथा गरिब समुदायका लागि विनियोजन गरिएको बजेट कार्यान्वयनमा सरकारी निकायबाट हुने ढिलाइप्रति समेत असन्तुष्टि जनाउँदै लक्षित वर्गका लागि छुट्याइएको बजेट प्रभावकारी रूपमा कार्यान्वयन गर्नुपर्नेमा जोड दिए।
