काठमाडौं । अमेरिकाले इरानमाथि पुनः सैन्य आक्रमण गरेपछि मध्यपूर्वमा तनाव बढेको छ। जवाफमा इरानले इराक र जोर्डनस्थित अमेरिकी सैन्य अखडालाई लक्षित गरी क्षेप्यास्त्र प्रहार गरेको छ।
दक्षिणी इरानको सिरिकमा अमेरिकी आक्रमणको छर्रा विवाह समारोह भइरहेको घरमा खस्दा एक बालकसहित चार जनाको मृत्यु भएको इरानी रेड क्रसले जनाएको छ। घटनामा ५० भन्दा बढी घाइते भएका छन्।
इरानी सञ्चारमाध्यमका अनुसार सिरिक आक्रमणपछि जोर्डनको अकबास्थित अमेरिकी मरीन बेसमा ब्यालिस्टिक क्षेप्यास्त्र प्रहार गरिएको थियो। जोर्डनले १३ क्षेप्यास्त्र रोकेको र १० वटा नष्ट गरेको जनाएको छ। आक्रमणबाट मानवीय क्षति नभएको बताइएको छ।
कुवेतले पनि इरानी क्षेप्यास्त्रको प्रतिकार गरिरहेको जनाएको छ भने बहराइनमा समेत विस्फोट भएको इरानी सञ्चारमाध्यमले उल्लेख गरेका छन्।
अमेरिकी सेन्ट्रल कमाण्डका अनुसार स्ट्रेट अफ होर्मुजमा व्यावसायिक जहाजमाथि आक्रमणको प्रयास भएपछि आईआरजीसीका सैन्य संरचनामाथि कारबाही गरिएको हो। अमेरिकी राष्ट्रपति डोनाल्ड ट्रम्पले इरानले थप आक्रमण गरे त्यसको जवाफ अझ कडा हुने चेतावनी दिएका छन्।
इरानी सञ्चारमाध्यमले चाबहार, कोनारक र जिरोफ्टका विमानस्थलसहित केही क्षेत्रमा अमेरिकी आक्रमण भएको दाबी गरेका छन्।
यसअघि अमेरिका र इजरायलले फेब्रुअरी २८ मा इरानमाथि व्यापक हमला गरेका थिए। त्यसपछि इरानले इजरायल र खाडी क्षेत्रमा रहेका अमेरिकी सैन्य अखडामाथि जवाफी आक्रमण गरेको थियो।
तनाव बढिरहेका बेला इरानी राष्ट्रपति मासौद पेजेस्कियानले अमेरिका समझदारीमा फर्किए इरान पनि वार्ताका लागि तयार रहेको बताएका छन्।
