काठमाडौं । बाढी तथा पहिरो प्रभावित धादिङ, नुवाकोट र रसुवामा खोज तथा उद्धारलाई प्रभावकारी बनाउन सशस्त्र प्रहरी बल नेपालले १२ वटा अस्थायी बेस सञ्चालनमा ल्याएको छ।
सशस्त्र प्रहरीका अनुसार धादिङमा दुई, नुवाकोटमा छ र रसुवामा चार बेस स्थापना गरिएका छन्। धादिङको मलेखु र गल्छी, नुवाकोटको देवीघाट, कोलोनी, रातमाटे, तारकेश्वर, बेत्रावती र तारुका तथा रसुवाका त्रिशूली हाइड्रो–३ए, त्रिशूली हाइड्रो–३बी, स्याफ्रुबेँसी र बोगटिटारमा बेस राखिएका छन्।
उद्धारलाई थप प्रभावकारी बनाउन मलेखु र तारकेश्वरमा मेडिकल टोलीसमेत परिचालन गरिएको छ। प्रत्येक बेसमा १५ देखि ३५ जनासम्म उद्धारकर्मी खटाइएको छ भने विशेष तालिमप्राप्त जनशक्तिलाई पनि परिचालन गरिएको सशस्त्र प्रहरीले जनाएको छ।
उद्धार टोलीले ड्रोन, तालिमप्राप्त कुकुर, गोताखोर, रोप रेस्क्यु तथा स्विफ्ट वाटर रेस्क्यु उपकरण प्रयोग गरिरहेको छ। साथै मेडिकल फर्स्ट रेस्पोन्डर, डेड बडी म्यानेजमेन्ट र मास क्याजुअल्टी भेहिकललगायत विशेष टोलीसमेत परिचालन गरिएको छ।
प्रभावित क्षेत्रमा खोज, उद्धार र राहत कार्यलाई थप तीव्र बनाउन आवश्यकता अनुसार थप जनशक्ति र उपकरण परिचालन गरिने सशस्त्र प्रहरीले जनाएको छ।
