काठमाडौं । भोटेकोशी हुँदै त्रिशूली नदीमा आएको भीषण बाढीका कारण प्रभावित नुवाकोटका विद्यालयहरू अनिश्चितकालका लागि बन्द गरिएका छन्।
बाढीबाट प्रत्यक्ष प्रभावित विदुर नगरपालिकासहित किस्पाङ गाउँपालिकाका सबै विद्यालय बन्द भएका छन्। यस्तै, बेलकोटगढी नगरपालिका र तारकेश्वर गाउँपालिकाका प्रभावित क्षेत्रका शैक्षिक संस्थामा समेत पठनपाठन स्थगित गरिएको छ।
बाढीका कारण विद्यार्थी, शिक्षक तथा अभिभावक बेपत्ता भएका छन्। विद्यालय भवन, सडक तथा पुलमा समेत क्षति पुगेपछि आवतजावत कठिन भएकाले तत्काल विद्यालय सञ्चालन गर्न नसकिएको विदुर नगरपालिकाका प्रमुख राजन श्रेष्ठले जानकारी दिए। उनका अनुसार जनजीवन सामान्य बन्दै गएपछि र नदी वारपार गर्न सहज भएपछि मात्र पठनपाठन पुनः सञ्चालन गरिनेछ।
विदुर नगरपालिकाका शिक्षा शाखा प्रमुख नवराज सापकोटाका अनुसार बाढीको पूर्वसूचना प्राप्त भए पनि क्षतिको अवस्था अनुमान गरिएभन्दा निकै ठूलो छ। “केही विद्यालयले उच्च सतर्कता अपनाएकाले ठूलो दुर्घटना हुनबाट जोगियो,” उनले भने, “अहिलेको असामान्य अवस्थामा भौतिक उपस्थितिमै तत्काल पठनपाठन सञ्चालन गर्न सम्भव छैन। केही समयपछि वैकल्पिक माध्यमबाट पढाइ सञ्चालन गर्ने योजना बनाउँदैछौँ।”
त्रिशूली नदीमा आएको बाढीबाट सबैभन्दा बढी प्रभावित विदुर नगर क्षेत्रका ८३ विद्यालयमध्ये एक दर्जनभन्दा बढी विद्यालय प्रत्यक्ष रूपमा प्रभावित भएका छन्। बाढीका कारण विद्यालयका भौतिक संरचना, शैक्षिक सामग्री तथा अन्य सम्पत्तिमा समेत करोडौँ रुपैयाँ बराबरको क्षति पुगेको प्रारम्भिक विवरण छ।
