काठमाडौं । नेकपा एमालेका अध्यक्ष केपी शर्मा ओलीले भदौ २४ गते भएको विध्वंसात्मक घटनाका कारण मुलुक कम्तीमा २५ वर्षभन्दा बढी पछाडि धकेलिएको बताएका छन्।
बालकोटस्थित आगजनीबाट क्षतिग्रस्त आफ्नो निवासको निरीक्षण गर्न पुगेका ओलीले सञ्चारकर्मीसँग कुरा गर्दै उक्त दिनलाई देशका लागि कालो दिनका रूपमा टिप्पणी गरे। उनका अनुसार घटनाबाट भएको क्षतिको असर तत्काल मात्र नभई आगामी वर्षहरूमा समेत देखिनेछ।
ओलीले पछिल्लो घटनाप्रति अहिले खुसी व्यक्त गरिरहेकाहरूले पनि त्यसको परिणाम आगामी दिनमा भोग्नुपर्ने धारणा राखे। उनले मुलुकको विकास, अर्थतन्त्र र समग्र प्रगतिमा यसले दीर्घकालीन असर पार्ने बताएका हुन्।
यसअघि गृहमन्त्री सुधन गुरुङले पुराना राजनीतिक दलका नेताहरूलाई आफ्नो कार्यशैली सुधार्न चेतावनी दिएका थिए। सोही अभिव्यक्तिप्रति प्रतिक्रिया जनाउँदै ओलीले नयाँ पुस्ताका राजनीतिक नेतृत्वको शैलीप्रति व्यङ्ग्य गरे।
उनले विगतमा आफूहरूलाई हेलिकप्टरमार्फत सुरक्षित स्थानमा जानुपर्ने अवस्था आएको प्रसंग स्मरण गर्दै अहिले त्यही विषयलाई लिएर दिइएका अभिव्यक्तिप्रति असन्तुष्टि जनाए। पछिल्लो समय राजनीतिक क्षेत्रमा नयाँ अनुहार आउने र जाने क्रम धेरै देखिएको भन्दै ओलीले त्यसलाई समेत व्यङ्ग्यात्मक रूपमा टिप्पणी गरेका छन्।
