काठमाडौं । नेपाली बजारमा आज सुन र चाँदी दुवैको मूल्य बढेको छ। नेपाल सुनचाँदी व्यवसायी महासंघका अनुसार सुनको मूल्य प्रतितोला १ हजार ५ सय रुपैयाँले बढेर २ लाख ९४ हजार ८ सय रुपैयाँ पुगेको छ।
यसअघि सोमबार र मंगलबार लगातार दुई दिनमा सुनको मूल्य प्रतितोला ८ हजार ८ सय रुपैयाँले घटेको थियो। त्यसपछि बुधबार २ हजार ८ सय रुपैयाँले बढेको सुनको भाउ बिहीबार भने २ लाख ९३ हजार ३ सय रुपैयाँमै स्थिर रहेको थियो।
यता, चाँदीको मूल्य पनि आज प्रतितोला २५ रुपैयाँले उकालो लागेको छ। महासंघका अनुसार चाँदी प्रतितोला ४ हजार ४ सय ५० रुपैयाँ पुगेको हो। बिहीबार यसको मूल्य ४ हजार ४ सय २५ रुपैयाँ थियो।
यसअघि गएको माघ १५ गते सुनको मूल्यमा एकैदिन प्रतितोला २० हजार ५ सय रुपैयाँको वृद्धि भएको थियो। उक्त दिन सुन प्रतितोला ३ लाख ३९ हजार ३ सय रुपैयाँ पुगेको थियो, जुन नेपाली बजारमा हालसम्मकै उच्च मूल्य हो।
चाँदीतर्फ भने गएको माघ १८ गते प्रतितोला १ हजार ५ सय ६५ रुपैयाँको गिरावट आएको थियो। यो हालसम्मकै ठूलो गिरावटका रूपमा रहेको छ।
यसअघि माघ १५ गते चाँदीको मूल्य पनि प्रतितोला ७ हजार ५ सय ५ रुपैयाँसम्म पुगेको थियो। उक्त मूल्य नेपाली बजारमा चाँदीको हालसम्मकै उच्च मूल्य हो।
