काठमाडौं । अमेरिकी राष्ट्रपति डोनाल्ड ट्रम्पले दुबईबाट तेल अभिभतर्फ उडेको फ्लाईदुबईको विमानमा पाइलटमाथि भएको आक्रमणमा इरानको संलग्नता पुष्टि भए कडा परिणाम भोग्नुपर्ने चेतावनी दिएका छन्।
ह्वाइट हाउसमा पत्रकारहरूसँग कुरा गर्दै ट्रम्पले घटनाबारे अनुसन्धान भइरहेको बताउँदै इरान जिम्मेवार पाइएमा ‘धेरै कडा’ कारबाही हुने बताएका हुन्।
घटनाका क्रममा सह–पाइलटले भारतीय क्याप्टेन स्मिट मच्छरमाथि छुरा प्रहार गरेपछि विमानको नियन्त्रणका लागि संघर्ष भएको थियो। यात्रुहरूको सहयोगमा सह–पाइलटलाई नियन्त्रणमा लिएपछि विमान साउदी अरेबियामा आपत्कालीन अवतरण गरिएको थियो। प्रारम्भिक अनुसन्धानले आक्रमण सह–पाइलटकै तर्फबाट भएको देखाएको छ।
इजरायली प्रधानमन्त्री बेन्जामिन नेतान्याहुले सह–पाइलट इस्लामवादी कट्टरपन्थी विचारबाट प्रभावित रहेको आरोप लगाएका छन्। युएईका अधिकारीहरूले भने घटनामा आतंकवादी गतिविधि वा त्यस्तो उद्देश्य भए–नभएको अनुसन्धान भइरहेको बताएका छन्। घाइते क्याप्टेन मच्छरको अवस्था राम्रो रहेको भारतीय दूतावासले जनाएको छ।
घटनापछि फ्लाईदुबईले इजरायलका लागि उडान स्थगित गरेको छ। यसैबीच, मध्यपूर्वमा अमेरिकी सैन्य उपस्थिति बढिरहेका बेला साउदी अरेबिया र कतारमा थप प्याट्रियट क्षेप्यास्त्र प्रणाली तैनाथ गरिएको र यूएसएस थियोडोर रुजवेल्टसहितको युद्धपोत समूह उक्त क्षेत्रमा अघि बढिरहेको ‘एक्सियोस’ले जनाएको छ।
