काठमाडौँ । नेपाल कम्युनिष्ट पार्टीले दार्चुलामा भारतीय सेनाको हेलिकोप्टर अवतरण भएको विषयमा सरकारसँग औपचारिक स्पष्टिकरण माग गरेको छ। सोमबार प्रतिनिधिसभा बैठकमा पार्टीका सांसद युवराज दुलालले उक्त घटनाबारे सरकारको ध्यानाकर्षण गराउँदै तत्काल जवाफ दिनुपर्ने आवश्यकता औंल्याएका हुन्।
बैठकमा बोल्दै सांसद दुलालले सञ्चार माध्यममा सार्वजनिक भएका विवरणलाई उद्धृत गर्दै भारतीय सुरक्षासम्बन्धी उच्च अधिकारीहरू उक्त हेलिकोप्टरमा सवार रहेको भन्ने समाचारप्रति सरकारको आधिकारिक धारणा माग गरे। उनले यस्तो संवेदनशील विषयमा स्पष्ट र पारदर्शी जानकारी दिन सरकार जिम्मेवार हुनुपर्ने बताए।
उनका अनुसार सीमा क्षेत्रमा भएको भनिएको घटनाबारे विभिन्न समाचार सार्वजनिक भए पनि सरकारको तर्फबाट औपचारिक जानकारी नआएकाले जनस्तरमा अन्योल बढेको छ। उनले यथार्थ विवरण तत्काल संसदमार्फत सार्वजनिक गर्न आग्रह गरे।
सांसद दुलालले सीमा सम्बन्धी विषयमा प्रधानमन्त्रीले दिएका भनिएका अभिव्यक्तिप्रति पनि आपत्ति जनाउँदै ती अभिव्यक्ति राष्ट्रिय हितअनुकूल नभएको आफ्नो दलको धारणा यथावत् रहेको उल्लेख गरे। उनका अनुसार प्रधानमन्त्रीले यस विषयमा संसदमा स्पष्ट जवाफ दिनुपर्ने आवश्यकता छ।
यस घटनाले प्रतिनिधिसभामा सीमा सुरक्षा र कूटनीतिक संवेदनशीलताबारे थप छलफललाई जन्म दिएको छ।
