काठमाडौं । बितेका २४ घण्टामा सवारी नियम उल्लङ्घन गर्ने २ हजार ५३५ जना चालकलाई कारबाही गरिएको छ। सो कारबाहीबाट राज्यकोषमा १९ लाख ७७ हजार रुपैयाँ राजस्व संकलन भएको छ।
काठमाडौं उपत्यका ट्राफिक प्रहरी कार्यालयका अनुसार विभिन्न किसिमका ट्राफिक नियम उल्लङ्घन गर्ने सवारी चालकहरूलाई कारबाही गरिएको हो।
कार्यालयका अनुसार मादक पदार्थ सेवन गरी सवारी चलाउने १०१ जना, नियमविपरीत राइड सेयरिङ गर्ने १२९ जना, ट्राफिक संकेत बत्ती उल्लङ्घन गर्ने १०६ जना तथा तीव्र गतिमा सवारी चलाउने १३८ जनालाई कारबाही गरिएको छ।
त्यसैगरी लेन अनुशासन पालना नगर्ने ८१ जना, निषेधित क्षेत्रमा हर्न बजाउने १४१ जना, सडक पेटीमा सवारी साधन पार्किङ गर्ने ११७ जना, एकतर्फी सडकमा सवारी चलाउने ११३ जना तथा अन्य ट्राफिक नियम उल्लङ्घन गर्ने १ हजार ६०९ जनालाई पनि कारबाही गरिएको कार्यालयले जनाएको छ।
