काठमाडौं । श्रम सँस्कृति पार्टीका सांसद आरेन राईले राष्ट्रिय हित र देशको माटोको संरक्षण जस्तो विषयमा सत्ता र प्रतिपक्षबीच विभाजन हुन नहुने बताएका छन्।
प्रतिनिधिसभाको बुधबारको बैठकमा बोल्दै उनले प्रधानमन्त्री बालेन्द्र शाहले नेपालले भारतसँग सीमा विवादमा मिचिएको भन्ने दिएको अभिव्यक्तिबारे संसदमा आएर स्पष्ट जवाफ दिनुपर्ने माग गरे।
सांसद राईले २००७ सालको क्रान्तिदेखि हालसम्मका विभिन्न राजनीतिक परिवर्तन र आन्दोलनलाई राज्यले कसरी मूल्यांकन गर्छ भन्ने विषयमा सरकारसँग प्रश्न उठाए। उनले २०४६ सालको जनआन्दोलन, २०५२ सालको जनयुद्ध, २०६२–६३ को जनआन्दोलन तथा पछिल्लो जेनजी आन्दोलनलाई वर्तमान सरकारले कुन दृष्टिकोणबाट हेरेको हो भन्ने स्पष्टता आवश्यक रहेको बताए।
उनले मानवअधिकार आयोगले जेनजी आन्दोलनबारे सार्वजनिक गरेको प्रतिवेदनको कार्यान्वयनबारे प्रधानमन्त्रीसँग बुझ्दा विगतका आन्दोलनसमेत समेटिने प्रतिक्रिया पाएको उल्लेख गरे।
सांसद राईले भदौ २३ र २४ गते भएको जेनजी आन्दोलनको सन्दर्भ जोड्दै आन्दोलनमा सहभागी केही व्यक्तिहरू सांसद वा मन्त्री बनेर देश सञ्चालनमा रहेको तर त्यही आन्दोलनमा संलग्न सामान्य नागरिकहरू जेलमा रहनु परेको भन्दै सरकारको व्यवहारप्रति प्रश्न उठाए।
