काठमाडौं। बाजुराको गौमुल गाउँपालिका–३ कटीगाउँमा पहिरोले दुई घर पूर्ण रूपमा क्षतिग्रस्त भएपछि जोखिममा रहेका १४ घरका ११५ जनालाई सुरक्षित स्थानमा स्थानान्तरण गरिएको छ।
बिहीबार परेको लगातारको वर्षापछि आएको पहिरोले पूर्णिमल बोहरा र बुदी बोहराको तीनतले घर पूर्ण रूपमा पुरिएको जिल्ला प्रहरी कार्यालय बाजुराले जनाएको छ। घरभित्र रहेका सामानसमेत पहिरोमा पुरिएका छन्।
प्रहरीका अनुसार आसपासका क्षेत्रमा पहिरोको जोखिम कायमै रहेकाले प्रभावित परिवारलाई अस्थायी टहरामा सारिएको छ। पुरिएका सामान निकाल्ने प्रयास भइरहेको छ।
गौमुल गाउँपालिकाले विस्थापित परिवारका लागि राहत सामग्रीसहितको टोली परिचालन गरेको जनाएको छ। गाउँपालिका अध्यक्ष हरिबहादुर रोकायाले प्रभावित परिवारको सहयोगमा जुट्न स्थानीय सामाजिक संघसंस्थालाई आग्रह गरेका छन्।
