काठमाडौँ । स्थानीय बजारमा आज सुनको मूल्य स्थिर रहेको छ भने चाँदीको मूल्य प्रतितोला १५ रुपैयाँले घटेको छ।
नेपाल सुनचाँदी व्यवसायी महासङ्घका अनुसार मंगलबार छापावाल सुन प्रतितोला २ लाख ९१ हजार ५०० रुपैयाँमा कारोबार भइरहेको छ।
त्यस्तै, चाँदीको मूल्य प्रतितोला ४ हजार ४१५ रुपैयाँ कायम भएको महासङ्घले जनाएको छ।
काठमाडौं। भारतले नेपालका चार जलविद्युत् आयोजनाबाट उत्पादित कुल ९६.५० मेगावाट विद्युत् निर्यातका लागि यसअघि दिएको अनुमति नवीकरण गरेको छ। नेपाल विद्युत् प्राधिकरणका अनुसार माथिल्लो चमेलिया, सेती नदी, माथिल्लो तादीखोला र माथिल्लो दोर्दी ‘ए’ आयोजनाको निर्यात अनुमति नवीकरण भएको हो।
नवीकरण भएका आयोजनामा माथिल्लो चमेलियाको ३८.८ मेगावाट, सेती नदीको २४.२५ मेगावाट, माथिल्लो तादीखोलाको १०.७० मेगावाट र माथिल्लो दोर्दी ‘ए’को २४.२५ मेगावाट विद्युत् रहेको छ।
यी आयोजनाको निर्यात अनुमति फरक–फरक समयमा सकिएको थियो। माथिल्लो चमेलियाको अनुमति जुन महिनाको अन्त्यमा, सेती नदी र माथिल्लो तादीखोलाको जुलाई ३१ मा तथा माथिल्लो दोर्दी ‘ए’को अगस्टमा समाप्त भएको थियो। भारतले गत साता अनुमति नवीकरण गरेको जानकारी प्राधिकरणलाई दिएको हो।
नेपालको विद्युत् व्यापारमा निर्यात–आयात दुवै निरन्तर
वर्षायाममा जलविद्युत् उत्पादन बढ्ने भएकाले आन्तरिक खपतपछि बाँकी विद्युत् नेपालले भारत र बंगलादेशमा निर्यात गर्दै आएको छ। हिउँदयाममा भने उत्पादन घट्ने भएकाले आन्तरिक माग व्यवस्थापनका लागि भारतबाट विद्युत् आयात गर्नुपर्ने अवस्था रहँदै आएको छ।
यसअघि भारतको ऊर्जा मन्त्रालयले ४०० केभी ढल्केबर–मुजफ्फरपुर र १३२ केभी टनकपुर–महेन्द्रनगर प्रसारण लाइनमार्फत नेपाललाई आगामी पुससम्म ६५४ मेगावाट विद्युत् आयात गर्न अनुमति नवीकरण गरिसकेको थियो। तर, सम्बन्धित आयोजनाको निर्यात अनुमति नवीकरण हुन बाँकी थियो।
प्राधिकरणका अनुसार नेपालले अहिले भारततर्फ दैनिक औसत ६ सय मेगावाट विद्युत् निर्यात गरिरहेको छ। चार आयोजनाको अनुमति नवीकरण भएपछि वर्षायाममा उत्पादित अतिरिक्त विद्युत् भारततर्फ निर्यातलाई निरन्तरता दिन सहज हुने प्राधिकरणको भनाइ छ।
काठमाडौं । राष्ट्रिय स्वतन्त्र पार्टी (रास्वपा)का सांसद डा. धनञ्जय रेग्मीले नेपाल वायुसेवा निगम (नेपाल एयरलाइन्स)लाई आर्थिक रूपमा सबल र अन्तर्राष्ट्रिय बजारमा प्रतिस्पर्धी बनाउन तीन वर्षे रणनीतिक कार्ययोजना अघि बढाउनुपर्ने बताएका छन्।
प्रतिनिधिसभाको अन्तर्राष्ट्रिय सम्बन्ध तथा पर्यटन समितिको सोमबार बसेको बैठकमा उनले निगमको व्यवस्थापन सुधार, डिजिटल टिकट बिक्री प्रणाली र उडान रुटको व्यावसायिक व्यवस्थापनलाई प्राथमिकतामा राख्नुपर्ने धारणा राखे।
रेग्मीले निगमको वित्तीय अवस्था सुधारका लागि प्रभावकारी वित्तीय अडिट आवश्यक रहेको उल्लेख गर्दै कुन गन्तव्यमा नाफा र कुन रुटमा घाटा भइरहेको छ भन्ने स्पष्ट विश्लेषण गर्नुपर्ने बताए। उनका अनुसार कार्गो र ग्राउन्ड ह्यान्डलिङ सेवाको आम्दानी तथा खर्चलाई छुट्टाछुट्टै लेखा प्रणालीमार्फत व्यवस्थापन गर्नुपर्छ।
जहाजको समयमै मर्मत तथा ओभरहाल हुन नसक्दा उडान प्रभावित हुने गरेकोतर्फ पनि उनले ध्यानाकर्षण गराए। यस्तो समस्या समाधान गर्न निगमको व्यवस्थापकीय संरचना र कार्यप्रणालीमै सुधार आवश्यक रहेको उनको भनाइ छ।
निगमले प्रतिस्पर्धी दरमा हवाई सेवा उपलब्ध गराउन सके विदेशी एयरलाइन्सले अस्वाभाविक रूपमा भाडा बढाउने अवस्थालाई नियन्त्रण गर्न सहयोग पुग्ने रेग्मीले बताए। यसबाट नेपाल आउने पर्यटकको लागत घट्नुका साथै पर्यटन प्रवर्द्धनमा समेत सकारात्मक प्रभाव पर्न सक्ने उनको भनाइ छ।
थप जहाज लिजमा ल्याउन नेपालले ‘केपटाउन कन्भेन्सन’मा तत्काल हस्ताक्षर गर्नुपर्नेमा उनले जोड दिए। उक्त सम्झौतामा सहभागी नभएसम्म अन्तर्राष्ट्रिय बजारबाट विमान लिजमा ल्याउन व्यावहारिक कठिनाइ रहने उनले बताए।
निगमलाई व्यावसायिक रूपमा सक्षम बनाउन स्पष्ट समयसीमा तोकेर तीन वर्षभित्र व्यवस्थापकीय र संरचनागत सुधारका काम अघि बढाउनुपर्ने सांसद रेग्मीको सुझाव छ। उनले मन्त्रालय र निगम नेतृत्वलाई मापनयोग्य लक्ष्य निर्धारण गरेर काम गर्न आग्रह गर्दै आवश्यक परे संसदीय समितिबाट सहजीकरण गर्ने बताए।
काठमाडौं । दशैं नजिकिँदै गर्दा बजारमा किनमेलको चहलपहल बढेको छ। दशैं, तिहार र छठलाई लक्षित गर्दै भाटभटेनी सुपरमार्केट र नेपालमा टाटा मोटर्सको आधिकारिक वितरक सिप्रदी ट्रेडिङ प्रालिले ग्राहकका लागि विशेष योजना सार्वजनिक गरेका छन्।
योजनाअनुसार भाटभटेनीका देशभरका कुनै पनि स्टोरबाट एकपटकमा २ हजार ५ सय रुपैयाँ वा सोभन्दा बढीको सामान खरिद गर्ने ग्राहक लकी ड्रमा सहभागी हुन सक्नेछन्। खरिदका क्रममा प्राप्त बिलका आधारमा ग्राहकको विवरण दर्ता गरिनेछ र योजनाको अन्त्यमा लकी ड्रमार्फत एक जना विजेता छनोट गरी नयाँ टाटा पन्च इभी प्रदान गरिनेछ।
त्यसैगरी, भाटभटेनीबाट सामान खरिद गरी नेपाल पेबाट स्क्यानमार्फत भुक्तानी गर्ने ग्राहकले पनि अर्को टाटा पन्च इभी जित्ने अवसर पाउनेछन्। यससँगै योजनाअन्तर्गत दुई जना ग्राहकले टाटा पन्च इभी जित्न सक्नेछन्।
योजनाको मुख्य आकर्षणका रूपमा राखिएको टाटा पन्च इभी नयाँ पुस्ताको इलेक्ट्रिक एसयुभी हो। टाटा मोटर्सका अनुसार नेपाली बजारको आवश्यकता र ग्राहकको जीवनशैलीलाई ध्यानमा राखेर विकास गरिएको यस गाडीमा सुरक्षा, प्रविधि, आराम र कनेक्टिभिटीलाई प्राथमिकता दिइएको छ।
‘एक्ट.इभी’ प्लेटफर्ममा निर्माण गरिएको पन्च इभी २५ केडब्लुएच र ४० केडब्लुएच ब्याट्री क्षमताका दुई विकल्पमा उपलब्ध छ। नेपालमा गरिएको परीक्षणअनुसार पूर्ण चार्जमा गाडीले ३०० देखि ३२५ किलोमिटरसम्म रेन्ज दिने कम्पनीले जनाएको छ।
गाडीमा १९० मिलिमिटर ग्राउन्ड क्लियरेन्स, बिएनक्याप ५–स्टार सुरक्षा रेटिङ, ६ एयरब्याग, ३६० डिग्री क्यामेरा र १.५ सी डीसी फास्ट चार्जरजस्ता सुविधा छन्। त्यस्तै, भ्वाइस–एक्टिभेटेड सनरुफ, २६.०३ सेन्टिमिटरको टच इन्फोटेनमेन्ट तथा डिजिटल क्लस्टर, भेन्टिलेटेड सिट र ३६६ लिटरको बुट स्पेस पनि उपलब्ध छन्।
टाटा मोटर्सका नेपालभर २० वटा सर्भिस सेन्टर सञ्चालनमा रहेको जनाइएको छ। साथै, देशभरका २८ वटा भाटभटेनी स्टोरबाट टाटा कारसम्बन्धी जानकारी लिन सकिने व्यवस्था गरिएको छ। दशैं अवधिमा भाटभटेनीमा किनमेल गर्ने टाटा कारका ग्राहकलाई विभिन्न सुविधा उपलब्ध गराइने कम्पनीले जनाएको छ।
काठमाडौं । अन्नपूर्ण आधार शिविर (एबिसी) पदयात्रामा पर्यटकको चाप बढेको छ । सडक तथा पदमार्ग सञ्चालनमा आएपछि पछिल्ला दिनमा दैनिक करिब ३०० पर्यटक एबिसी पुग्न थालेका छन् ।
छोम्रोङ पर्यटन व्यवस्थापन समितिका सचिव दिलीप गुरुङका अनुसार अहिले विदेशी तथा सार्क राष्ट्रका पर्यटकको आगमन उल्लेख्य बढेको छ । वर्षापछि मौसममा सुधार आउनु र अन्नपूर्ण क्षेत्रका अवरुद्ध सडक खुल्नुका साथै मनाङ तथा मनास्लु क्षेत्रका केही पदमार्ग प्रभावित भएपछि पर्यटकको गन्तव्य एबिसीतर्फ मोडिएको हो ।
मनाङ र मनास्लु क्षेत्रका सडक तथा पदमार्ग पहिरोका कारण प्रभावित भएपछि एबिसी तुलनात्मक रूपमा सहज विकल्प बनेको गुरुङले बताए । दसैँपछि नेपाली पर्यटकको आगमनसमेत बढ्ने अपेक्षा गरिएको उनको भनाइ छ ।
यसअघि बाढीपहिरोका कारण अन्नपूर्ण क्षेत्रका विभिन्न सडक र पदमार्ग प्रभावित हुँदा पर्यटक आवागमन घटेको थियो । मोदी खोलाको कटानका कारण बिरेठाँटी र स्याउली बजारमा अवरुद्ध सडक करिब डेढ महिनापछि असोज पहिलो साता सञ्चालनमा आएको हो ।
अन्नपूर्ण–११ का वडाध्यक्ष हिमबहादुर गुरुङका अनुसार पोखरा–घान्द्रुक–एबिसी खण्डका सडक अहिले सञ्चालनमा छन् । केही स्थानमा अस्थायी व्यवस्था गरेर पदमार्गसमेत खुलाइएको छ । नयाँपुल, घान्द्रुक र छोम्रोङ हुँदै एबिसी पुग्न सकिने अवस्था बनेको उनले बताए ।
किम्रुङखोलाले बगाएको पक्की झोलुङ्गे पुलका कारण अवरुद्ध पदमार्गमा पनि काठे फड्के निर्माण गरेर आवागमन खुलाइएको छ ।
पर्यटकको बढ्दो चापलाई ध्यानमा राख्दै माछापुच्छ्रे बेस क्याम्पमा प्राथमिक उपचार केन्द्रसमेत सञ्चालनमा ल्याइएको छ । उच्च उचाइका कारण पर्यटकमा लेक लाग्ने तथा अन्य स्वास्थ्य समस्या देखिन सक्ने भएकाले केन्द्रबाट तत्काल प्राथमिक उपचार सेवा उपलब्ध गराइनेछ ।
समुद्री सतहबाट करिब ४ हजार १३० मिटर उचाइमा रहेको एबिसी अन्नपूर्ण तथा माछापुच्छ्रे हिमालको दृश्यावलोकनका लागि लोकप्रिय पदयात्रा गन्तव्य हो ।
काठमाडौं । मुस्ताङको कोरला नाकालाई अन्तर्राष्ट्रिय व्यापारिक नाकाका रूपमा स्तरोन्नति गर्न चीनले नेपालसँग प्रस्ताव अघि बढाएको छ। यसअघि नेपालले पहल गर्दै आए पनि चिनियाँ पक्षबाट खासै चासो नदेखाइएको कोरला नाकाबारे पछिल्लो समय चीन स्वयं सकारात्मक देखिएको हो।
ल्हासास्थित नेपाली महावाणिज्यदूत लक्ष्मी निरौलाका अनुसार चीनले नाका सञ्चालनका लागि आवश्यक पूर्वाधार निर्माणमा नेपाललाई सहयोग गर्न सकिने संकेतसमेत दिएको छ। अन्तर्राष्ट्रिय नाका बनेपछि नेपालसँगै अन्य मुलुकका नागरिकले पनि कोरला हुँदै चीन प्रवेश गर्न सक्नेछन्।
चीनले कोरला नाकालाई कैलाश मानसरोवर र ल्हासा जाने यात्रुका लागि वैकल्पिक स्थलमार्गका रूपमा विकास गर्न खोजेको बताइएको छ। हाल यात्रु आवतजावतका लागि प्रयोग हुँदै आएका तातोपानी र रसुवागढी नाका बन्द रहेकाले पनि कोरला सञ्चालनमा चिनियाँ चासो बढेको हो।
यसै क्रममा नेपालका लागि चिनियाँ राजदूत चाङ माओमिङसहित सात सदस्यीय टोलीले कोरला नाकाको स्थलगत अवलोकन गरेको छ। टोलीले नाकामा रहेका पूर्वाधार तथा काठमाडौं–कोरला सडकको अवस्थाबारे जानकारी लिएको थियो।
मुस्ताङकी प्रमुख जिल्ला अधिकारी अजिता शर्माका अनुसार चिनियाँ टोलीलाई जिल्लाको सडक तथा पूर्वाधारको अवस्थाबारे जानकारी दिइएको थियो। बाढीपहिरोका कारण मुस्ताङ–म्याग्दी सडक सम्पर्क प्रभावित भएको विषयसमेत टोलीलाई अवगत गराइएको उनले बताइन्।
कोरला नाकाको स्तरोन्नतिबारे औपचारिक निर्णय भने कूटनीतिक माध्यमबाट हुने बताइएको छ। लोमान्थाङ गाउँपालिकाका अध्यक्ष टसी नर्बु शेर्पाले नाका व्यवस्थित गर्न नेपालले पूर्वाधार विकासमा थप पहल गर्नुपर्ने बताएका छन्।
कोरला नाका २०८० कात्तिक २७ गते औपचारिक रूपमा खुलेको थियो। करिब ४ हजार ६ सय ५० मिटरको उचाइमा रहेको यो नाका पछिल्लो समय सीमित रूपमा व्यापारिक गतिविधिमा प्रयोग हुँदै आएको छ।
यसबीच नेपालले तातोपानी नाका पनि तत्काल सञ्चालन गर्न चीनसँग आग्रह गरिरहेको छ। महावाणिज्यदूत निरौलाका अनुसार तातोपानी नाका दशैंअघि नै खुल्न सक्ने सम्भावना छ।
काठमाडौं । दैनिक जीवनमा आवश्यक पर्ने विभिन्न सेवा खोज्न र सेवाप्रदायकसम्म पुग्न अब फरक–फरक ठाउँ धाउनुपर्ने बाध्यता कम हुने भएको छ।
घरायसी कामदेखि प्राविधिक, विशेषज्ञ तथा व्यावसायिक सेवासम्म एउटै डिजिटल प्लेटफर्मबाट उपलब्ध गराउने उद्देश्यसहित ‘डेली सेवा’ सञ्चालनमा आएसगै यस्तो बाध्यता कम हुने भएको हो । डेली सेवा प्रालिले सञ्चालनमा ल्याएको यो डिजिटल सर्भिस मार्केटप्लेसले सेवाग्राही र सेवाप्रदायकलाई प्रविधिमार्फत एउटै प्लेटफर्ममा जोड्ने अवधारणा अघि सारेको छ ।
कम्पनीका अनुसार डेली सेवालाई ‘नेपालकै आफ्नै डिजिटल मार्केटप्लेस’ का रूपमा विकास गर्ने लक्ष्य राखिएको छ। सेवाग्राहीले आफूलाई आवश्यक परेको सेवा आफ्नो स्थानबाटै खोज्न सक्नेछन् भने सेवा प्रदान गर्ने व्यक्ति तथा कम्पनीले पनि आफ्नो सीप, सेवा र व्यवसायलाई डिजिटल माध्यमबाट थप ग्राहकसम्म पुर्याउन सक्नेछन्।
एउटै एपमा १० विधाका १०० भन्दा बढी सेवा
डेली सेवामा हाल १० विधाअन्तर्गत १०० भन्दा बढी सेवा उपलब्ध रहेको कम्पनीले जनाएको छ।
घर निर्माण तथा मर्मत, विद्युतीय उपकरण मर्मत, सीप तथा तालिम, विशेषज्ञ सेवा, ग्याजेट तथा टेक्निकल सपोर्ट, अनकल सेवा, लजिस्टिक्स तथा ढुवानी, किचन तथा क्लिनिङलगायत विभिन्न क्षेत्रका सेवाहरू प्लेटफर्ममा समेटिएका छन्।
सेवाग्राहीले वेबसाइट वा मोबाइल एपमार्फत आफूलाई आवश्यक सेवा खोज्न सक्नेछन्। सेवा उपलब्ध गराउने व्यक्ति वा कम्पनीले पनि आफ्नो विवरण तथा आफूले प्रदान गर्ने सेवाको जानकारी राखेर प्लेटफर्ममा आबद्ध हुन सक्ने व्यवस्था गरिएको छ।
सेवाप्रदायकलाई पनि डिजिटल बजार
डेली सेवाले उपभोक्तालाई सेवा उपलब्ध गराउनेसँगै सीप भएका जनशक्तिलाई आफ्नो सेवा र व्यवसाय विस्तार गर्ने डिजिटल अवसर उपलब्ध गराउने लक्ष्य राखेको छ।
दक्ष, अर्धदक्ष तथा अदक्ष जनशक्तिलाई समेत प्लेटफर्ममा जोडेर उनीहरूको सेवा सम्भावित ग्राहकसम्म पुर्याउने कम्पनीको योजना छ।
डेली सेवा प्रालिका प्रमुख कार्यकारी अधिकृत प्रकाश न्यौपाने एउटै डिजिटल प्लेटफर्ममार्फत दैनिक जीवन, घर, व्यवसाय र विशेषज्ञ आवश्यकतासँग सम्बन्धित सेवाहरू जोड्ने प्रयास गरिएको बताउँछन्। “कुनै पनि व्यक्तिले आफूलाई आवश्यक परेको सेवा घरमै बसेर लिन सक्ने भएकाले समय र श्रमको बचत हुने अपेक्षा गरेका छौं,” न्यौपानेले भने।
उनका अनुसार प्लेटफर्ममा आबद्ध सेवाप्रदायकले डिजिटल माध्यमबाट आफ्नो सेवा प्रवर्धन गर्दै थप सेवाग्राहीसम्म पुग्ने अवसर पाउनेछन्।
सेवाको गुणस्तरमा मूल्यांकन प्रणाली
अनलाइन मार्फत सेवा लिँदा सेवाप्रदायकप्रतिको विश्वास र सेवाको गुणस्तर महत्वपूर्ण हुने भएकाले डेली सेवाले सेवाप्रदायक छनोट तथा व्यवस्थापनमा विश्वास, गुणस्तर र व्यावसायिकतालाई प्राथमिकता दिएको जनाएको छ।
सेवा लिएपछि सेवाग्राहीले आफ्नो अनुभवका आधारमा सेवाप्रदायकको मूल्यांकन गर्न सक्ने प्रणालीसमेत प्लेटफर्ममा राखिएको छ। यसले सेवा छनोटमा सेवाग्राहीलाई सहजता हुने तथा सेवाप्रदायकलाई आफ्नो सेवा सुधार गर्न प्रोत्साहन मिल्ने अपेक्षा गरिएको छ।
काठमाडौं उपत्यकाबाट सुरुवात, देशभर विस्तारको तयारी
नेपालमा डिजिटल अर्थतन्त्र र प्रविधिमा आधारित व्यवसायको विस्तारसँगै अनलाइनमार्फत सेवा खोज्ने प्रवृत्ति बढिरहेको छ। यही परिवर्तित आवश्यकता र उपभोक्ताको व्यवहारलाई ध्यानमा राखेर डेली सेवा सुरु गरिएको कम्पनीको भनाइ छ।
हाल काठमाडौं उपत्यकाबाट सेवा सुरु गरेको डेली सेवाले आगामी दिनमा देशका अन्य क्षेत्रमा समेत विस्तार गर्ने लक्ष्य लिएको छ।
डेली सेवा प्रयोग गर्न वेबसाइट तथा मोबाइल एप उपलब्ध छन्। प्लेटफर्ममा उपलब्ध सेवा र थप जानकारीका लागि dailysewa.com हेर्न सकिनेछ। मोबाइल एप प्लेस्टोर तथा एपस्टोरबाट समेत डाउनलोड गर्न सकिने कम्पनीले जनाएको छ।
काठमाडौं । नेपाली बजारमा आज सुन र चाँदी दुवैको मूल्य बढेको छ। नेपाल सुनचाँदी व्यवसायी महासंघका अनुसार सुनको मूल्य प्रतितोला १ हजार ५ सय रुपैयाँले बढेर २ लाख ९४ हजार ८ सय रुपैयाँ पुगेको छ।
यसअघि सोमबार र मंगलबार लगातार दुई दिनमा सुनको मूल्य प्रतितोला ८ हजार ८ सय रुपैयाँले घटेको थियो। त्यसपछि बुधबार २ हजार ८ सय रुपैयाँले बढेको सुनको भाउ बिहीबार भने २ लाख ९३ हजार ३ सय रुपैयाँमै स्थिर रहेको थियो।
यता, चाँदीको मूल्य पनि आज प्रतितोला २५ रुपैयाँले उकालो लागेको छ। महासंघका अनुसार चाँदी प्रतितोला ४ हजार ४ सय ५० रुपैयाँ पुगेको हो। बिहीबार यसको मूल्य ४ हजार ४ सय २५ रुपैयाँ थियो।
यसअघि गएको माघ १५ गते सुनको मूल्यमा एकैदिन प्रतितोला २० हजार ५ सय रुपैयाँको वृद्धि भएको थियो। उक्त दिन सुन प्रतितोला ३ लाख ३९ हजार ३ सय रुपैयाँ पुगेको थियो, जुन नेपाली बजारमा हालसम्मकै उच्च मूल्य हो।
चाँदीतर्फ भने गएको माघ १८ गते प्रतितोला १ हजार ५ सय ६५ रुपैयाँको गिरावट आएको थियो। यो हालसम्मकै ठूलो गिरावटका रूपमा रहेको छ।
यसअघि माघ १५ गते चाँदीको मूल्य पनि प्रतितोला ७ हजार ५ सय ५ रुपैयाँसम्म पुगेको थियो। उक्त मूल्य नेपाली बजारमा चाँदीको हालसम्मकै उच्च मूल्य हो।
काठमाडौं । बाढीपहिरोका कारण म्याग्दीको अन्नपूर्ण गाउँपालिका–४ नारच्याङस्थित ६ मेगावाट क्षमताको रेलेखोला जलविद्युत् आयोजनाको विद्युत् उत्पादन बन्द भएको छ। आयोजनाको बाँधमा बाढी पस्दा भौतिक संरचनामा क्षति पुगेपछि उत्पादन रोकिएको हो।
आयोजना प्रमुख दार्शनिक काफ्लेका अनुसार असोज ८ देखि ११ गतेसम्म परेको वर्षासँगै रेलेखर्क क्षेत्रमा पहिरो गएको थियो। पहिरोपछि रेलेखोलामा बाढीको बहाव बढेर बाँधमा थुप्रिएपछि आयोजना सञ्चालन प्रभावित भएको हो।
बाँधस्थलसम्म पुग्ने पहुँचमार्गसमेत पहिरोका कारण अवरुद्ध छ। दुर्गम क्षेत्रमा रहेको आयोजनामा बाढी तथा पहिरोले क्षति पुर्याएकाले तत्काल मर्मत गरी उत्पादन सुरु गर्न कठिनाइ भइरहेको काफ्लेले बताए।
ह्युम कन्सल्ट प्रालि प्रवर्द्धक रहेको आयोजना गत वर्ष निर्माण सम्पन्न भएको थियो। आयोजनाबाट उत्पादित विद्युत् २२० केभी क्षमताको दाना सबस्टेसनमार्फत राष्ट्रिय प्रसारण प्रणालीमा जोडिएको छ।
बाढीपहिरोका कारण आयोजनाले विद्युत् बिक्रीबाट हुने आम्दानी गुमाउनुका साथै भौतिक संरचनामा समेत क्षति बेहोर्नुपरेको छ। यसैगरी कालीगण्डकीमा आएको बाढीपहिरोले प्रसारण लाइनका टावर बगाउनुका साथै तार चुँडाएर क्षति पुर्याएको जनाइएको छ।
काठमाडौं । दसैँ, तिहार र छठ पर्वलाई लक्षित गर्दै साल्ट ट्रेडिङ कर्पोरेशन लिमिटेडले काभ्रेको बनेपा र धुलिखेलमा सुपथ मूल्य पसल सञ्चालनमा ल्याएको छ ।
चाडपर्वका बेला बजारमा हुनसक्ने मूल्यवृद्धिलाई ध्यानमा राख्दै उपभोक्तालाई दैनिक उपभोग्य सामग्री सहुलियत दरमा उपलब्ध गराउने उद्देश्यले पसल सञ्चालन गरिएको हो । पसलमा चाडपर्वका लागि आवश्यक खाद्यान्न तथा घरायसी सामग्री खरिद गर्ने उपभोक्ताको चाप बढेको कर्पोरेशनले जनाएको छ ।
बनेपाको तीनदोबाटोस्थित साल्ट ट्रेडिङको वितरण केन्द्रमा रहेको सुपथ मूल्य पसल छठ पर्वसम्म सञ्चालन हुनेछ । शनिबारसहित सातै दिन बिहान ९ बजेदेखि साँझ ६ बजेसम्म पसल खुला रहनेछ ।
साल्ट ट्रेडिङ कर्पोरेशन बनेपा शाखाका कार्यालय प्रमुख सुरेन्द्र अवालेका अनुसार उपभोक्ताका लागि विभिन्न सामग्रीमा विशेष मूल्य निर्धारण गरिएको छ ।
| सामग्री | मूल्य |
|---|---|
| नुन (प्रतिकेजी) | रु २४ |
| चिनी (प्रतिकेजी) | रु १०० |
| भान्साघर स्टिम जिरा मसिनो चामल (२५ केजी) | रु २,५८० |
| मुसुरो दाल (प्रतिकेजी) | रु १४० |
| रहर दाल (प्रतिकेजी) | रु २१० |
| मास दाल (प्रतिकेजी) | रु २०५ |
| चना दाल (प्रतिकेजी) | रु १५५ |
| डिडीसी घ्यु | रु १,१४० |
| शान्ति तोरीको तेल | रु ३८० |
| तृप्ति तोरीको तेल | रु २७० |
| एसटिसी ग्यास सिलिन्डर | रु २,१६५ |
| लुनार २,००० वाट इन्डक्सन कुकटप | रु ४,९६० |
| किनमेल गर्ने झोला | रु ३५ |
विभिन्न ब्रान्डका चामल, मुग दाल, सिमी तथा अन्य गेडागुडीसमेत छुट मूल्यमा उपलब्ध रहेको कर्पोरेशनले जनाएको छ । मनश्री र सिवालिक ब्रान्डका आटा तथा मैदा, कोदो र फापरको पिठो तथा मकै र जौको च्याख्ला पनि पसलमा राखिएको छ ।
त्यस्तै, सनबिम सूर्यमुखी तेल, अर्गानिक लसुन, अदुवा, दालचिनी, खुर्सानी, बेसारलगायत मसला तथा विभिन्न ब्रान्डका चिया पनि बिक्रीका लागि उपलब्ध छन् ।
खुला बजारको तुलनामा सुपथ मूल्य पसलमा केही खाद्यान्न तथा घरायसी सामग्री सस्तो दरमा पाइएपछि उपभोक्ताले राहत महसुस गरेको बताएका छन् ।
बनेपाकी उपभोक्ता रमिता नेपालीले चाडपर्वको समयमा नुन, तेल, चामल र दालजस्ता दैनिक आवश्यक सामग्री सहुलियत मूल्यमा पाउँदा घरखर्च व्यवस्थापनमा सहज भएको बताइन् ।
साल्ट ट्रेडिङले असोज १ गतेदेखि चाडपर्व लक्षित सुपथ मूल्य पसल सञ्चालन गरेको हो । कर्पोरेशनले बनेपा र धुलिखेलबाहेक विर्तामोड, विराटनगर, राजविराज, लहान, जनकपुर, वीरगञ्ज, हेटौँडा, नारायणगढ, त्रिशूली, पोखरा र बागलुङमा समेत सुपथ मूल्य पसल सञ्चालन गरेको जनाएको छ ।