काठमाडौँ । नेपाली कांग्रेस संसदीय दलका नेता तथा प्रतिनिधिसभा सदस्य भीष्मराज आङदेम्बेले सुनसरी–सिरहा घटनाको सत्यतथ्य पत्ता लगाउन र न्यायिक छानविन गर्न संसदीय छानविन समिति गठन गर्न माग गरेका छन् ।
प्रतिनिधिसभाको मंगलबारको बैठकमा बोल्दै सांसद आङदेम्बेले सुनसरी र सिरहामा गोली चलाउनुपर्ने अवस्था सरकारका लागि किन सिर्जना भयो भन्दै प्रश्न उठाएका छन् । उनले घटनाबारे सरकारले चित्तबुझ्दो जवाफ दिनुपर्ने र त्यसको जिम्मेवारी लिनुपर्ने बताए ।
उनले सरकारको विपत व्यवस्थापन पक्ष कमजोर रहेको आरोप लगाउँदै प्राकृतिक विपतका घटनामा सरकार सुस्त देखिएको टिप्पणी गरे । वैशाख २३ गतेको बाढीपहिरोका कारण इलामको मेची राजमार्ग अवरुद्ध भएको तथा जेठ ८ गते पाँचथरको याङवरक गाउँपालिका–२ र ३ मा बाढीपहिरो गएको उनले सदनलाई जानकारी गराए ।
बाढीपहिरोका कारण घर तथा पुल बगेको उल्लेख गर्दै उनले पाँचथरको फालेलुङ क्षेत्रमा समेत ठूलो क्षति पुगेको बताए । यस विषयमा आफूले सभामुखलाई भेटेर सरकारको ध्यानाकर्षण गराइसकेको पनि उनले जानकारी दिए ।
विपत पूर्वसूचना दिएर नआउने भन्दै उनले सरकारको तयारीमाथि प्रश्न उठाए । “सरकारले ठूलो विपत आइसकेपछि मात्र तयारी गर्न खोजेको हो ? कि सरकारको कुनै पूर्वतयारी छ ?” उनले प्रश्न गरे ।
सांसद आङदेम्बेले सरकारले सुकुमबासी बस्ती हटाउने क्रममा अमानवीय व्यवहार गरेको आरोप पनि लगाए । सरकारले अहिलेसम्म विस्थापितहरूको उचित व्यवस्थापन गर्न नसकेको भन्दै उनले राज्यसँग स्पष्ट नीति र विधि नभई बल प्रयोग मात्र देखिएको टिप्पणी गरे ।
