काठमाडौँ। बागमती प्रदेशमा नयाँ सरकार गठनको प्रक्रिया अघि बढाउन राजनीतिक दलहरूले छलफललाई तीव्र बनाएका छन् । सत्ता समीकरणका लागि नेकपा (एमाले) र नेपाली कम्युनिष्ट पार्टी (नेकपा) बीच सहमति भइसकेपछि अन्य दलहरूको समर्थन जुटाउने प्रयास सुरु भएको छ ।
सरकार गठनका लागि एमालेले राष्ट्रिय प्रजातन्त्र पार्टी, हाम्रो नेपाली पार्टी र नेपाल मजदुर किसान पार्टीसँग समेत छलफल अघि बढाएको एमाले संसदीय दलका प्रमुख सचेतक एकालाल श्रेष्ठले जानकारी दिए ।
“सरकार गठनका लागि दलहरूसँग छलफल तीव्र रूपमा अघि बढेको छ,” उनले भने, “सरकार गठनको गतिरोध चाँडै अन्त्य गर्ने गरी संवाद भइरहेको छ ।”
यसैबीच नयाँ सरकार गठनको अन्योल अन्त्य गर्न मुख्यमन्त्री इन्द्रबहादुर बानियाँले विभिन्न दलका नेताहरूसँग छलफल गरिरहेको नेपाली कांग्रेस बागमती प्रदेश संसदीय दलका प्रमुख सचेतक पुकार महर्जनले बताए ।
मुख्यमन्त्री बानियाँले नयाँ सरकार गठनका लागि स्पष्ट बहुमत जुटाउन वा कांग्रेस नेतृत्वको वर्तमान सरकारलाई नै समर्थन गरेर राजनीतिक अस्थिरता अन्त्य गर्न दलहरूलाई आग्रह गरेका छन् ।
१०४ सदस्यीय बागमती प्रदेश सभामा नेपाली कांग्रेस, नेकपा एमाले, नेकपा लगायत छ दलको प्रतिनिधित्व रहेको छ । प्रदेश सभामा नेपाली कांग्रेस ३६ सिटसहित सबैभन्दा ठूलो दल रहेको छ भने नेकपाको २६ र एमालेको २५ सिट छ । त्यस्तै राष्ट्रिय प्रजातन्त्र पार्टीसँग १२, नेपाल मजदुर किसान पार्टीसँग तीन र हाम्रो नेपाली पार्टीसँग दुई सिट रहेको छ ।
प्रदेश सरकार गठनका लागि ५३ सांसदको समर्थन आवश्यक पर्छ । कांग्रेस नेतृत्वको सरकारबाट समर्थन फिर्ता लिएर एमाले बाहिरिएपछि नयाँ सरकार गठनका लागि आवश्यक बहुमत जुट्न नसक्दा राजनीतिक गतिरोध कायमै रहेको छ ।
नेपालका प्रमुख राजनीतिक दल नेपाली कांग्रेस र एमालेले प्रदेशमा अन्य दलहरूको समर्थन लिएर आ–आफ्नै नेतृत्वमा सरकार गठन गर्ने प्रयास जारी राखेका छन् ।
