काठमाडौं । राष्ट्रिय स्वतन्त्र पार्टी (रास्वपा) का सभापति रवि लामिछानेको आह्वानमा बिहीबार सर्वदलीय बैठक बस्दै छ।
भोटेकोशी बाढीबाट भएको जनधनको क्षति, प्रभावित क्षेत्रमा भइरहेको खोजी तथा उद्धार, राहत वितरण र आगामी पुनःस्थापनाका विषयमा छलफल गर्न बैठक बोलाइएको रास्वपाले जनाएको छ। बाढीबाट प्रभावित नागरिकलाई तत्काल राहत उपलब्ध गराउनेदेखि दीर्घकालीन पुनःस्थापना तथा विपद् व्यवस्थापनलाई प्रभावकारी बनाउने विषयमा बैठकमा छलफल हुने बताइएको छ।
रास्वपाका प्रवक्ता जगदीश खरेलका अनुसार बैठक बिहान ९ बजे सिंहदरबारस्थित राष्ट्रिय स्वतन्त्र पार्टीको संसदीय दलको कार्यालयमा बस्नेछ।
बैठकमा विभिन्न राजनीतिक दलका प्रतिनिधिहरू सहभागी हुने अपेक्षा गरिएको छ। भोटेकोशी बाढीबाट प्रभावित क्षेत्रमा देखिएको मानवीय तथा भौतिक क्षतिको अवस्थाबारे समीक्षा गर्दै उद्धार, राहत र पुनःस्थापनाका लागि राजनीतिक दलहरूबीच साझा पहल र समन्वयको आवश्यकता बारे पनि छलफल हुने बताइएको छ।
