काठमाडौं । निर्माण व्यवसायी महासंघ कर्णाली प्रदेशको सातौँ साधारण सभा तथा तेस्रो अधिवेशनबाट मानव बम अध्यक्षमा निर्वाचित भएका छन् ।
वीरेन्द्रनगरमा दुई दिनसम्म सञ्चालन भएको अधिवेशनले आगामी कार्यकालका लागि नयाँ नेतृत्व चयन गरेको हो । अधिवेशनमा कर्णाली प्रदेशभरका निर्माण व्यवसायी, प्रतिनिधि तथा महासंघका पदाधिकारीहरूको उल्लेखनीय सहभागिता रहेको थियो ।
नवनिर्वाचित अध्यक्ष बम पूर्व कर्णाली प्रदेश महासचिव, बसना निर्माण सेवाका निर्देशक तथा कालिकोटको रास्कोट नगरपालिका निवासी हुन् । लामो समयदेखि निर्माण क्षेत्रमा सक्रिय बम संगठनभित्र अनुभवी, समन्वयकारी र व्यवसायीहरूको साझा आवाजका रूपमा परिचित छन् ।
अधिवेशनअघि उनले अध्यक्ष पदका लागि उम्मेदवारी घोषणा गरेका थिए, जसलाई निर्माण व्यवसायीहरूले प्रतिस्पर्धात्मक र अर्थपूर्ण रूपमा लिएका थिए ।
निर्वाचनपछि अध्यक्ष बमले निर्माण व्यवसायीहरूको हक–हित संरक्षण, व्यवसायमैत्री वातावरण निर्माण, पारदर्शी तथा उत्तरदायी नेतृत्व, संस्थागत सुदृढीकरण र कर्णालीका निर्माण व्यवसायीहरूले भोगिरहेका साझा समस्याको समाधानलाई आफ्नो नेतृत्वको मुख्य प्राथमिकता बनाउने प्रतिबद्धता व्यक्त गरेका छन् ।
उनले कर्णाली प्रदेशका सबै जिल्लाका निर्माण व्यवसायीलाई एउटै सूत्रमा आबद्ध गर्दै महासंघलाई अझ सशक्त, प्रभावकारी र परिणाममुखी संस्थाका रूपमा विकास गर्ने लक्ष्य रहेको बताए ।
साथै, सार्वजनिक खरिद प्रक्रिया सुधार, निर्माण सम्पन्न भएका आयोजनाको समयमै भुक्तानी, नीतिगत सुधार तथा व्यवसायीका समस्या समाधानका लागि सम्बन्धित निकायसँग प्रभावकारी समन्वय गर्दै अघि बढ्ने योजना रहेको अध्यक्ष बमले बताएका छन् ।
Read More
