काठमाडौं। नेपाल विद्युत् प्राधिकरणले गत असार मसान्तसम्म खपत भएको विद्युत्मा मूल्य अभिवृद्धि कर (भ्याट) नलाग्ने स्पष्ट पारेको छ। आन्तरिक राजस्व विभाग र ठूला करदाता कार्यालयको स्पष्टिकरणपछि असारसम्मको विद्युत् खपतमा भ्याट नलाग्ने र ग्राहकले भुक्तानी गरिसकेको भ्याट रकम आगामी भदौ महिनाको विद्युत् बिलमा समायोजन गरिने प्राधिकरणले जनाएको हो।
प्राधिकरणका अनुसार यसअघि असार महिनाको विद्युत् खपतको बिल साउनमा जारी हुँदा आर्थिक ऐन, २०८३ अनुसार भ्याट लाग्ने वा नलाग्ने विषयमा अन्योल उत्पन्न भएको थियो। त्यसपछि प्राधिकरणले साउन ८ गते आन्तरिक राजस्व विभाग र ठूला करदाता कार्यालयसँग यस विषयमा स्पष्टिकरण मागेको थियो।
आन्तरिक राजस्व विभागले सोमबार जारी गरेको सूचनामार्फत असार मसान्तसम्मको विद्युत् उपभोग वा खपतको बिलमा भ्याट नलाग्ने जनाएको छ। त्यसअनुसार ग्राहकबाट असुल गरिएको भ्याट रकमलाई अग्रिम भुक्तानीका रूपमा गणना गरी आगामी भदौ महिनाको बिलमा समायोजन गरिने व्यवस्था मिलाइएको प्राधिकरणले जनाएको छ।
यद्यपि, साउन १ गतेदेखि भएको विद्युत् खपतमा भने भ्याट लागू हुने विभागले स्पष्ट गरेको छ। विभागका अनुसार विद्युत् शक्तिको खपत, न्यूनतम चार्ज (डिमाण्ड चार्ज) लगायतका शुल्कमा मूल्य अभिवृद्धि कर ऐनअनुसार अन्तिम उपभोक्ताका लागि ५ प्रतिशत र अन्य उपभोक्ताका हकमा १३ प्रतिशत भ्याट लाग्नेछ।
यसअघि प्राधिकरणले असार मसान्तसम्मको विद्युत् बिलमा समेत भ्याट जोडेर बिल पठाएपछि उपभोक्ताबाट व्यापक गुनासो आएको थियो।
