काठमाडौं । महालेखा परीक्षकको पछिल्लो प्रतिवेदनले गरुडा नगरपालिकामा १ करोड १ लाख ६० हजार ५४१ रुपैयाँ बराबरको आर्थिक अनियमितता भएको देखाएको छ।
प्रतिवेदनअनुसार आवश्यक कागजात, प्रमाण तथा कानुनी प्रक्रिया पूरा नगरी, मेयर कन्थमणी जयसबाल र उनका छोराहरूको मौखिक आदेशमा समेत भुक्तानी गरिएको पाइएको छ। केही खर्चमा बिल–भर्पाई, दररेट, कार्यसम्पन्न प्रतिवेदन र प्राविधिक पुष्टि नै नभएको महालेखाले जनाएको छ।
नगरपालिकाले सार्वजनिक खरिद ऐन र वित्तीय अनुशासन उल्लङ्घन गर्दै स्वीकृति बिना खर्च तथा कमजोर लेखा व्यवस्थापन गरेको प्रतिवेदनमा उल्लेख छ। केही योजनाहरू सम्पन्न भएको दाबी गरिए पनि आवश्यक प्रमाण नपाइएको र मूल्याङ्कन स्पष्ट नभए पनि भुक्तानी भएको देखिएको छ।
महालेखाले आन्तरिक नियन्त्रण प्रणाली सुदृढ गर्न, सार्वजनिक खरिद प्रक्रिया पारदर्शी बनाउन र नियमित लेखा परीक्षण प्रभावकारी गर्न सुझाव दिएको छ।
स्थानीयवासीले भने हरेक वर्ष यस्ता प्रतिवेदन आए पनि सुधार नदेखिएको भन्दै विकास बजेटको दुरुपयोग र पारदर्शिताको अभावप्रति चिन्ता व्यक्त गरेका छन्।
