काठमाडौं । प्रधानमन्त्री वालेन्द्र शाहले निर्माण क्षेत्रमा देखिएका समस्या, निर्माण व्यवसायीले भोगिरहेका व्यावहारिक चुनौती तथा आवश्यक नीतिगत सुधारका विषयमा आज नेपाल निर्माण व्यवसायी महासङ्घका पदाधिकारीसँग छलफल गर्ने भएका छन्।
प्रधानमन्त्री तथा मन्त्रिपरिषद्को कार्यालयमा हुने छलफलमा नेपाल निर्माण व्यवसायी महासङ्घका अध्यक्ष निकोलश पाण्डे, वरिष्ठ उपाध्यक्ष मुकेश पन्त, महासचिव शिवहरि घिमिरे, बागमती प्रदेश उपाध्यक्ष बालकृष्ण थापा तथा महासङ्घका पूर्वअध्यक्ष एवं सल्लाहकार जयराम लामिछाने सहभागी हुने कार्यक्रम रहेको छ।
प्रधानमन्त्री शाहका प्रेस तथा अनुसन्धान विज्ञ दीपा दाहालका अनुसार बैठक सरकार र निर्माण व्यवसायीबीचको सहकार्यलाई थप प्रभावकारी बनाउने, निर्माण क्षेत्रमा देखिएका विद्यमान समस्या पहिचान गर्ने तथा तिनको समाधानका लागि आवश्यक नीतिगत र प्रशासनिक सहजीकरणका उपायबारे केन्द्रित हुनेछ।
हाल निर्माण व्यवसायीहरूले भुक्तानीमा ढिलाइ, सार्वजनिक खरिद प्रक्रियाका जटिलता, निर्माण सामग्रीको मूल्यवृद्धि, आयोजनाको समयसीमा, ठेक्का व्यवस्थापन तथा नीतिगत अस्पष्टताजस्ता विषयलाई प्रमुख चुनौतीका रूपमा उठाउँदै आएका छन्। यिनै विषयमा सरकार र निजी क्षेत्रबीच साझा समझदारी कायम गरी निर्माण क्षेत्रलाई थप गतिशील बनाउने उद्देश्यले छलफल हुन लागेको जनाइएको छ।
सरकारले पछिल्ला दिनमा पूर्वाधार विकासलाई प्राथमिकतामा राख्दै सार्वजनिक निर्माण आयोजनाको प्रभावकारी कार्यान्वयन र निजी क्षेत्रसँगको समन्वयलाई सुदृढ बनाउन विभिन्न सरोकारवालासँग नियमित संवादलाई निरन्तरता दिँदै आएको छ।
