काठमाडौं । सञ्चारगृहभित्रै प्रवेश गरेर पत्रकार पक्राउ गरिएको घटनालाई लिएर नेपाली कांग्रेसका वरिष्ठ उपसभापति विश्वप्रकाश शर्माले सरकारसँग जवाफ मागेका छन्। पक्राउ परेका पत्रकार रिहा हुँदैमा घटना समाप्त नहुने भन्दै उनले गिरफ्तारीको निर्देशन कसले दिएको थियो र त्यसको जिम्मेवारी कसले लिने भन्ने प्रश्न उठाएका हुन्।
सामाजिक सञ्जालमार्फत धारणा सार्वजनिक गर्दै शर्माले घटनाको वास्तविकता बाहिर ल्याउनुपर्ने बताएका छन्। उनले पक्राउको कारण, आदेश दिने पक्ष र जिम्मेवार व्यक्तिबारे स्पष्ट जवाफ आवश्यक रहेको उल्लेख गरेका छन्।
केही महिनाअघि सञ्चारगृहअगाडि मोटर राखेर आतंक सिर्जना गरिएको घटनाको स्मरण गराउँदै शर्माले त्यसमा संलग्न दोषी पहिचान गर्न सरकारले चासो नदेखाएको आरोपसमेत लगाएका छन्। यसपटक सञ्चारगृहभित्रै प्रहरी प्रवेश गरी पत्रकार पक्राउ गरिएको र प्रधानमन्त्री कार्यालयले आफ्नो संलग्नता नरहेको स्पष्टीकरण दिएको विषयमा पनि उनले प्रश्न गरेका छन्।
शर्माको भनाइमा सरकारको जिम्मेवारी आफू संलग्न थिइनँ भनेर स्पष्टीकरण दिनुमा मात्र सीमित हुँदैन। मुलुकको चौथो अंगमाथि यस्ता घटना हुँदा सरकारले प्रेस स्वतन्त्रताको रक्षा कसरी गर्छ भन्ने कुरा महत्त्वपूर्ण हुने उनको तर्क छ।
सत्तारूढ राष्ट्रिय स्वतन्त्र पार्टीले पत्रकार पक्राउलाई गैरकानुनी भन्दै प्रतिक्रिया दिएको विषयलाई सकारात्मक माने पनि शर्माले सरकारको दायित्व व्यवहारमै देखिनुपर्ने बताएका छन्। प्रेस स्वतन्त्रता चुनावी घोषणापत्रमा उल्लेख गर्ने विषय मात्र नभई त्यसको रक्षा गर्ने जिम्मेवारीसमेत सरकारको भएको उनको भनाइ छ।
गलत वा भ्रमपूर्ण समाचारको खण्डन गर्ने र आवश्यक कानुनी कारबाही अघि बढाउने निश्चित प्रक्रिया हुँदाहुँदै सञ्चारगृहमा प्रहरी प्रवेश गरेर पत्रकार पक्राउ गर्नु उचित नभएको उल्लेख गर्दै शर्माले संविधानप्रदत्त प्रेस स्वतन्त्रतामाथि हस्तक्षेप बन्द गर्न आग्रह गरेका छन्।
